ພິທີສ້າງຕັ້ງກອງເລຂາຈີນການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໄດ້ຈັດຂຶ້ນໃນຕອນເຊົ້າວັນທີ 10 ມີນາ 2017 ນີ້ຢູ່ນະຄອນຫຼວງປັກກິ່ງໂດຍທ່ານຫວາງຢີ້ ລັດຖະມົນຕີການຕ່າງປະເທດຈີນ, ທູຕານຸທູດ 5 ປະເທດລຸ່ມແມ່ນ້ຳຂອງປະຈຳຈີນ,ຜູ້ຕາງໜ້າອົງການຈັດຕັ້ງສາກົນແລະແຂກຖືກເຊີນທັງຈີນແລະຕ່າງປະເທດປະມານ 200 ທ່ານເຂົ້າຮ່ວມ.
ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນປາໄສໃນພິທີວ່າ: ທ່ານຫຼີເຄີ້ສຽງ ນາຍົກລັດຖະມົນຕີຈີນແລະຜູ້ນຳ5 ປະເທດລຸ່ມແມ່ນ້ຳຂອງໄດ້ຮ່ວມກັນສ້າງຕັ້ງກົນໄກຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຢູ່ເມືອງຊານຢ້າແຂວງໄຫຫຼຳໃນເດືອນມີນາປີຜ່ານມາ. ໃນເວລາບໍ່ຮອດໜຶ່ງປີ, ໄດ້ສ້າງກົນໄກພົບປະໃນຫຼາຍລະດັບແລະສ້າງຂອບການຮ່ວມມື 3+5 ແລະໄດ້ຮັບຄວາມຄືບໜ້າຢ່າງພົ້ນເດັ່ນໃນຫຼາຍດ້ານເປັນຕົ້ນ ການປະຕິບັດ45ໂຄງການສຳເລັດຜົນໄລຍະຕົ້ນ, ສ້າງຕັ້ງໜ່ວຍງານປະສົມຂົງເຂດບູລິມະສິດ ອັນໄດ້ສ່ອງແສງຄວາມໄວແລະປະສິດທິຜົນຂອງກົນໄກຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ. ຈຸດພິເສດຂອງການຮ່ວມມືດັ່ງກ່າວຄືຕິດແທດຕົວຈິງແລະມີປະສິດທິພາບສູງ, ຈະບໍ່ເປັນກົນໄກຫາລືແບບບໍ່ມີປະໂຫຍດ, ແຕ່ເປັນແມ່ແຮງຕົວຈິງໃນການຊຸກຍູ້ຂະບວນການຮ່ວມມືຮ່ວມມືຢ່າງໜັກແໜ້ນແລະຕໍ່ເນື່ອງ, ເຮັດໃຫ້ 6 ປະເທດລຸ່ມແມ່ນ້ຳລ້ານຊ້າງ-ແມ່ນ້ຳຂອງລ້ວນແຕ່ຈະໄດ້ຮັບຜົນປະໂຫຍດຕົວຈິງຈາກການຮ່ວມມືດັ່ງກ່າວ.
ທ່ານຫວງຢີ້ຢືນຢັນວ່າ: ການສ້າງຕັ້ງກອງເລຂາຈີນສະແດງໃຫ້ເຫັນອີກເທື່ອໃໝ່ວ່າ ລັດຖະບານຈີນຍິນດີຮ່ວມມືກັບ 5 ປະເທດລຸ່ມແມ່ນ້ຳຂອງສົ່ງເສີມຄວາມຕັ້ງໃຈແລະຄວາມຕັດສິນໃຈໃນການຮ່ວມມື.ພວກເຮົາຈະສ້າງຕັ້ງໜ່ວຍງານປະສົມໃນທຸກຂົງເຂດບຸລິມະສິດ,ແລະປະຕິບັດໂຄງການເບື້ອງຕົ້ນໃຫ້ສຳເລັດຜົນພາຍໃນປີນີ້,ສຸມໃສ່ສ້າງຕັ້ງແຜນດຳເນີນງານ 5 ປີຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ,ເພື່ອກະກຽມເປັນຢ່າງດີໃຫ້ແກ່ການພົບປະລັດຖະມົນຕີການຕ່າງປະເທດໃນຕໍ່ໜ້າແລະກອງປະຊຸມສຸດຍອດຄັ້ງຕໍ່ໄປ. ພວກເຮົາຍັງຈະເພີ່ມທະວີການແລກປ່ຽນດ້ານວັດທະນະທຳ. ເຊື່ອໝັ້ນວ່າພາຍໃຕ້ຄວາມພະຍາຍາມຮ່ວມຂອງ 6 ປະເທດ, ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງບໍ່ພຽງແຕ່ຈະຊຸກຍູ້ສາຍພົວພັນມິດຕະພາບລະຫວ່າງ6 ປະເທດຂຶ້ນສູ່ລະດັບໃໝ່ເທົ່ານັ້ນ,ຍັງຈະຊຸກຍູ້ຂະບວນການເຊື່ອມໂຍງເປັນອັນໜຶ່ງອັນດຽວກັນຂອງອາຊຽນແລະສະໜັບສະໜູນການສ້າງປະຊາຄົມອາຊຽນອີກດ້ວຍ.