ວັນທີ 10 ມີນານີ້, ສານລັດຖະທຳມະນູນ ສ.ເກົາຫຼີ ໄດ້ປະກາດເຫັນດີກ່າວໂທດຕໍ່ທ່ານນາງ ປັກກຸນເຮ ປະທານາທິບໍດີ ສ.ເກົາຫຼີ, ເຊິ່ງນາງໄດ້ກາຍເປັນປະທານາທິບໍດີທີ່ຖືກປົດຕຳແໜ່ງຜູ້ທຳອິດໃນປະຫວັດສາດການເມືອງແລະລັດຖະທຳມະນູນຂອງ ສ.ເກົາຫຼີ.
ໃນເວລາປະມານ 11 ໂມງຕາມເວລາທ້ອງຖິ່ນ ທ່ານນາງ ລີຊຸງມີ ຕົວແທນສານລັດຖະທຳມະນູນ ສ.ເກົາຫຼີ ໄດ້ອ່ານຄຳຕັດສິນຄະດີກ່າວໂທດປະທານາທິບໍດີ. ຫຼັງຈາກນັ້ນ, ທ່ານນາງ ລີຊຸງມີ ໄດ້ປະກາດວ່າ: ຜູ້ພິພາກສາສານລັດຖະທຳມະນູນ 8 ທ່ານໄດ້ເຫັນດີເປັນເອກະພາບຕໍ່ຄະດີກ່າວໂທດດັ່ງກ່າວ. ຕາມຂໍ້ກຳນົດ,ທ່ານນາງປັກກຸນເຮຈະຖືກປົດຕຳແໜ່ງປະທານາທິບໍດີພ້ອມທັງບໍ່ມີສິດຮ້ອງຂໍອຸທອນແຕ່ຢ່າງໃດ, ສ.ເກົາຫຼີ ຕ້ອງຈັດການເລືອກຕັ້ງທົ່ວໄປພາຍໃນ 60 ວັນ.
ການປະກາດຕັດສິນຄະດີກ່າວໂທດຄັ້ງນີ້ໄດ້ຮັບຄວາມສົນໃຈຈາກທົ່ວປະເທດ, ແລະໄດ້ຖ່າຍທອດສົດຂະບວນປະກາດການຕັດສິນດັ່ງກ່າວທາງໂທລະພາບ. ຂະນະດຽວກັນ,ຢູ່ນອກປະຕູສານລັດຖະທຳມະນູນໄດ້ມີປະຊາຊົນມາເຕົ້າໂຮມກັນຢ່າງຫຼວງຫຼາຍ ເພື່ອລໍຖ້າປະກາດຜົນການຕັດສິນ. ເພື່ອປ້ອງກັນບໍ່ໃຫ້ມີການປະທະກັນຢ່າງດຸເດືອດລະຫວ່າງປະຊາຊົນສອງຝ່າຍທີ່ສະໜັບສະໜູນແລະຄັດຄ້ານນາງ, ໃນມື້ດຽວກັນ, ເຈົ້າໜ້າທີ່ຕຳຫຼວດ ສ.ເກົາຫຼີ 21.600 ຄົນໄປປ້ອງກັນສານລັດຖະທຳມະນູນແລະທຳນຽບປະທານາທິບໍດີຊົງວາເດກໍຄືສະຖານທີ່ສຳຄັນຕ່າງໆຂອງລັດຖະບານຢູ່ນະຄອນຫຼວງເຊອູນ.