ຕາມຂ່າວສານຈີນ: ວັນທີ 9 ມີນານີ້, ທ່ານ ໂຣດຣີໂກ ດູເຕີເຕ ປະທານາທິບໍດີຟິລິບປິນ ໄດ້ແຕ່ງຕັ້ງທ່ານ ມານາໂລ ຮອງລັດຖະມົນຕີທີ່ຊີ້ນຳວຽກງານນະໂຍບາຍຂອງກະຊວງການຕ່າງປະເທດ ເປັນຜູ້ວ່າການແທນລັດຖະມົນຕີການຕ່າງປະເທດ ເພື່ອເຂົ້າແທນທ່ານ ເປີເຟັກໂຕ ຢາໄຊ ທີ່ຖືກປົດຕຳແໜ່ງຈາກຄະນະກຳມະການແຕ່ງຕັ້ງໃນມື້ກ່ອນ.
ຍ້ອນວ່າທ່ານຢາໄຊຕັ້ງໃຈປິດບັງທີ່ເຄີຍມີສັນຊາດອາເມລິກາ, ການທີ່ແຕ່ງຕັ້ງທ່ານ ຢາໄຊ ເປັນລັດຖະມົນຕີການຕ່າງປະເທດນັ້ນ ໄດ້ຖືກຄະນະກຳມະການແຕ່ງຕັ້ງທີ່ປະກອບດ້ວຍສະມາຊິກສອງສະພານັ້ນປະຕິເສດ. ຈາກນັ້ນ, ທ່ານ ຢາໄຊ ຈຶ່ງຖືກປົດຕຳແໜ່ງລັດຖະມົນຕີການຕ່າງປະເທດ ແລະອີງຕາມຂໍ້ກຳນົດ, ທ່ານ ດູເຕີເຕ ຈະບໍ່ສາມາດສືບຕໍ່ສະເໜີທ່ານ ຢາໄຊ ເປັນລັດຖະມົນຕີການຕ່າງປະເທດອີກ.
ທ່ານ ເອີເນັສໂຕ ອາເບລາ ໂຄສົກທຳນຽບປະທານາທິບໍດີຟິລິບປິນ ໄດ້ອອກຖະແຫຼງການໃນວັນທີ 9 ມີນານີ້ວ່າ, ກ່ອນທ່ານ ດູເຕີເຕ ແຕ່ງຕັ້ງລັດຖະມົນຕີການຕ່າງປະເທດຄົນໃໝ່, ທ່ານ ມານາໂລ ຈະວ່າການແທນຕຳແໜ່ງດັ່ງກ່າວ, ແລະເນັ້ນວ່າ, ກ່ອນໜ້ານີ້, ທ່ານ ມານາໂລ ໄດ້ຮ່ວມກັບທ່ານ ຢາໄຊ ເຮັດວຽກແກ້ໄຂຫຼາຍບັນຫາສຳຄັນມາໂດຍຕະຫຼອດ, ຈຶ່ງເປັນຜູ້ວ່າການແທນທີ່ເໝາະສົມທີ່ສຸດ.