ຕາມຂ່າວສານຈີນ: ກ່ອນໜ້ານີ້ບໍ່ດົນ, ທ່ານ ໄຈນຸດດິນ ບິນ ຢາໄຮ ເອກອັກຄະລັດຖະທູດມະເລເຊຍປະຈຳຈີນກ່າວວ່າ, ການຮ່ວມມືລະຫວ່າງໂຮງຮຽນຊັ້ນສູງຂອງມະເລເຊຍແລະເຂດກວາງຊີຈີນ ຈະຊຸກຍູ້ວຽກງານການສຶກສາຊັ້ນສູງຂອງສອງປະເທດແລະໄດ້ຮັບຜົນປະໂຫຍດຮ່ວມກັນ, ພ້ອມທັງເປັນການຊຸກຍູ້ສາຍພົວພັນສອງປະເທດກ້າວສູ່ລວງເລິກຕື່ມອີກ ແລະຈະມີຜົນສະທ້ອນທີ່ດີຕໍ່ການເສີມຂະຫຍາຍການພົວພັນມິດຕະພາບຈີນ-ອາຊຽນ ແລະຊຸກຍູ້ວຽກງານການສຶກສາໃຫ້ມີຄວາມກ້າວໜ້າຮ່ວມກັນ.
ນັບແຕ່ວັນທີ 6-9 ມີນານີ້, ທ່ານ ໄຈນຸດດິນ ໄດ້ນຳພາຄະນະຜູ້ແທນດຳເນີນການແລກປ່ຽນດ້ານການສຶກສາແລະວັດທະນະທຳຢູ່ເມືອງນານນິງ, ປາຍເຊີ້, ກຸ້ຍລິນ ແລະອື່ນໆຂອງເຂດກວາງຊີຈີນ ແລະເຂົ້າຮ່ວມເປັນສັກຂີພິຍານໃຫ້ແກ່ການເຊັນສັນຍາການຮ່ວມມືລະຫວ່າງມະຫາວິທະຍາໄລ 7 ແຫ່ງເຊັ່ນ ມະຫາວິທະຍາໄລມະເລເຊຍ, ມະຫາວິທະຍາໄລພາກເໜືອມະເລເຊຍ, ມະຫາວິທະຍາໄລຊາບາ, ມະຫາວິທະຍາໄລປູຕຣາ ແລະມະຫາວິທະຍາໄລຣາມານເປັນຕົ້ນ ກັບມະຫາວິທະຍາໄລທີ່ກ່ຽວຂ້ອງຂອງເຂດກວາງຊີຈີນ, ໃນຕໍ່ໜ້າ, ວົງການການສຶກສາຂອງມະເລເຊຍຈະຮ່ວມມືຮອບດ້ານກັບເຂດກວາງຊີໃນການແລກປ່ຽນນັກສຶກສາ, ການຢ້ຽມຢາມເຊິ່ງກັນແລະກັນລະຫວ່າງອາຈານ, ແລກປ່ຽນດ້ານວິຊາການ ແລະຮ່ວມກັນສ້າງສູນອົບຮົມຊັບພະຍາກອນມະນຸດ.
 |
