ຈີນເຄົາລົບທ່ານ ເຈີ້ງເຮີ ແລະເອົາໃຈໃສ່ການຮ່ວມມືທາງທະເລ; ສ່ວນຕາເວັນຕົກເຄົາລົບທ່ານ ອັນເຟຣັດ ທາເຢີ ມາຮານ ແລະເນັ້ນການຄວບຄຸມສິດທາງທະເລ. ຫວ່າງມໍ່ໆມານີ້, ທ່ານ ວາງຢີ້ ລັດຖະມົນຕີກະຊວງການຕ່າງປະເທດຈີນ ໄດ້ປຽບທຽບທັດສະນະກ່ຽວກັບທະເລຂອງຕາເວັນອອກແລະຕາເວັນຕົກໃນການຖະແຫຼງຂ່າວຂອງກອງປະຊຸມສອງສະພາຈີນ ໂດຍໄດ້ອະທິບາຍເປັນຢ່າງດີວ່າ ເປັນຫຍັງ ໃນເວລາອິດທິກຳລັງຕາເວັນຕົກຄວບຄຸມບັນຫາທະເລຈີນໃຕ້ເມື່ອສອງປີກ່ອນ ວິກິດການໄດ້ຕົກຢູ່ໃນສະພາບທີ່ຈະເກີດຂຶ້ນໃນບາດດຽວ. ແຕ່ເລີ່ມແຕ່ປີກາຍນີ້ເປັນຕົ້ນມາ, ສະຖານະການທະເລຈີນໃຕ້ ໄດ້ສະຫງົບລົງຢ່າງວ່ອງໄວ ທັງນີ້ແມ່ນຍ້ອນວ່າ ປະເທດໃນພາກພື້ນນີ້ໄດ້ສຳນຶກຮູ້ວ່າ, ການປະທະກັນແລະການເປັນປໍລະປັກກັນ ບໍ່ສາມາດແກ້ໄຂບັນຫາໄດ້ ແລະກັບຄືນສູ່ຮູບການແກ້ໄຂແບບຕາເວັນອອກ. ແນ່ນອນແລ້ວ, ເມື່ອຫວນຄືນປະຫວັດສາດແລ້ວເຫັນວ່າ, ຫຼາຍປະເທດອ້ອມຂ້າງທະເລຈີນໃຕ້ ລ້ວນແຕ່ເຄີຍໄດ້ຮັບຜົນປະໂຫຍດຈາກກອງກຳປັ່ນຂອງທ່ານ ເຈີ້ງເຮີ ແລະເຄີຍຖືກຮຸກຮານຈາກກອງກຳປັ່ນຕາເວັນຕົກ.
ຈະມີຄວາມຫວັງໄດ້ແນວໃດວ່າ ຜູ້ລ່າເມືອງຂຶ້ນໃນອະດີດ ຈະຊ່ວຍແກ້ໄຂຂໍ້ວິວາດກັນລະຫວ່າງບ້ານໃກ້ເຮືອນຄຽງພວກເຮົາ? ທ່ານ ມາເກລານ ຜູ້ລ່າເມືອງຂຶ້ນຄົນທຳອິດ ກໍເຄີຍຢາກໄກ່ເກ່ຍຄວາມຂັດແຍ້ງກັນລະຫວ່າງກົກເຫຼົ່າຂອງຟິລິບປິນດ້ວຍທ່າທາງເອກອ້າງທະນົງໃຈ,ສ ແຕ່ໃນທີ່ສຸດ ບໍ່ພຽງແຕ່ບໍ່ໄດ້ບັນລຸໝາກຜົນເທົ່ານັ້ນ, ຊ້ຳພັດເສຍຊີວິດ. ເຊື່ອແນ່ວ່າ ທ່ານປະທານາທິບໍດີດູເຕີເຕ ຍັງຈື່ເລື່ອງນີ້ໄວ້ຢູ່, ສະນັ້ນ, ຫຼັງຈາກທ່ານຂຶ້ນດຳລົງຕຳແໜ່ງແລ້ວ ກໍໄດ້ປະຕິເສດການຈັດວາງລ່ວງໜ້າຂອງປະເທດນອກພາກພື້ນທັນທີ, ເລືອກການປັບປຸງການພົວພັນກັບຈີນໃຫ້ດີຂຶ້ນ.
ເມື່ອບໍ່ສົນໃຈການລົບກວນຂອງພາຍນອກແລ້ວ, ການປຶກສາຫາລືແກ້ໄຂບັນຫາທະເລຈີນໃຕ້ລະຫວ່າງຈີນກັບບັນດາປະເທດໃນອາຊຽນ ກໍໄດ້ຮັບການບຸກທະລຸຢ່າງວ່ອງໄວ. ທ່ານ ວາງຢີ້ ລັດຖະມົນຕີກະຊວງການຕ່າງປະເທດຈີນ ໃຫ້ຮູ້ວ່າ, ການປຶກສາຫາລືຂອງໜ່ວຍງານປະສົມທີ່ຈັດຂຶ້ນຢູ່ເກາະບາຫຼີໃນທ້າຍເດືອນຜ່ານມາ ໄດ້ຮ່າງຂອບ 'ກົດແຫ່ງການປະພຶດຢູ່ທະເລຈີນໃຕ້' ສະບັບທຳອິດ, ຈີນແລະປະເທດໃນອາຊຽນ ລ້ວນແຕ່ຮູ້ສຶກເພິ່ງພໍໃຈຕໍ່ເລື່ອງນີ້. ນອກນີ້, ສື່ມວນຊົນຂອງອິນໂດເນເຊຍ ທີ່ເປັນເຈົ້າພາບ ກໍໄດ້ລາຍງານວ່າ, ການປຶກສາຫາລືຄັ້ງນີ້ ໄດ້ຮັບຄວາມຄືບໜ້າທີ່ມີຄວາມໝາຍຍິ່ງຂຶ້ນ, ນັ້ນກໍຄື ຈີນແລະປະເທດອາຊຽນ ຈະສະເໜີໂຄງການຮ່ວມມືທະເລຈີນໃຕ້ທີ່ສາມາດປະຕິບັດໄດ້ ເພື່ອຮັກສາສັນຕິພາບຂອງທະເລຈີນໃຕ້ ເຊິ່ງໂຄງການຮ່ວມມືທີ່ອາຊຽນຢາກສະເໜີນັ້ນ ກໍລວມທັງການຮ່ວມຊອກຄົ້ນຊ່ວຍເຫຼືອຢູ່ເຂດທະເລຈີນໃຕ້.
ຄວາມຈິງຢັ້ງຢືນໃຫ້ເຫັນວ່າ, ຖ້າບໍ່ມີການລົບກວນຂອງອິດທິກຳລັງພາຍ ນອກ, ທະເລຈີນໃຕ້ ກໍແມ່ນທະເລແຫ່ງສັນຕິພາບ, ມິດຕະພາບ ແລະການຮ່ວມມືລະຫວ່າງຈີນກັບບັນດາປະເທດໃນອາຊຽນມາໂດຍຕະຫຼອດ. ຫຼັງຈາກການຮ່ວມມືແບບຕ່າງຝ່າຍຕ່າງມີຜົນປະໂຫຍດລະຫວ່າງຈີນກັບອາຊຽນ ຜ່ານທົດສະວັດຄຳແລ້ວ, ເຄີຍຖືກລົບກວນຈາກອິດທິກຳລັງພາຍນອກທີ່ເຈຕະນາບໍ່ດີ. ກໍຄືທ່ານ ວາງຢີ້ ເວົ້າວ່າ, ປີຜ່ານມາ, ທະເລຈີນໃຕ້ມີຄື້ນຟອງແຮງແລະຄ່ອຍ ແຕ່ໃນທີ່ສຸດ ໄດ້ສະຫງົບລົງ. ນີ້ແມ່ນໝາກຜົນຈາກຄວາມພະຍາຍາມຮ່ວມຂອງຈີນແລະປະເທດໃນອາຊຽນ, ເຊິ່ງຖືວ່າເປັນເລື່ອງທີ່ດີສຳລັບພາກພື້ນ ກໍຄືຄວາມສຸກສຳລັບທົ່ວໂລກ. ຖ້າຍັງມີໃຜຢາກເກາະຜິດຂຶ້ນອີກ ບໍ່ພຽງແຕ່ບໍ່ຖືກໃຈຜູ້ທີ່ຮັກຫອມສັນຕິພາບເທົ່ານັ້ນ ມັນຍັງຈະຖືກປະເທດໃນພາກພື້ນປະຕິເສດຮ່ວມກັນອີກດ້ວຍ.
 |
