ຕາມຂ່າວສານຈີນ:ທ່ານດຸເຣຊາ ທີ່ປຶກສາຂະບວນການສັນຕິພາບຂອງປະທານາທິບໍດີຟິລິບປິນເປີດເຜີຍໃນວັນທີ 12 ມີນານີ້ວ່າ,ລັດຖະບານປະເທດຕົນແລະພັກກອມມູນິດຈະຈັດການເຈລະຈາສັນຕິພາບເປັນທາງການຄືນໃໝ່.
ທາງການຟິລິບປິນເຜີຍໃຫ້ຮູ້ວ່າ,ຫຼັງລັດຖະບານນອກແວໄດ້ໄກ່ເກ່ຍແລະເປັນປະທານ, ລັດຖະບານຟິລິບປິນແລະອົງການການເມືອງທີ່ນຳໂດຍພັກກອມມູນິດຄື "ແນວໂຮມປະຊາທິປະໄຕແຫ່ງຊາດ"ໄດ້ເຈລະຈາກັນບໍ່ເປັນທາງການໃນວັນທີ 10 ແລະ 11 ມີນານີ້ໂດຍສອງຝ່າຍເຫັນດີຈັດການເຈລະຈາສັນຕິພາບຢ່າງເປັນທາງການຮອບທີ 4 ໃນເດືອນເມສາຂະນະທີ່ກອງທະຫານລັດຖະບານແລະ "ກອງທັບປະຊາຊົນໃໝ່"ທີ່ນຳໂດຍພັກກອມມູນິດຟິລິບປິນຍັງເຫັນດີຟື້ນຟູມາດຕະການຢຸດຍິງແຕ່ຝ່າຍດຽວຫຼັງຢຸດຊະງັກມາກ່ອນໜ້ານີ້.
ວັນທີ 12 ມີນານີ້,ທຳນຽບປະທານາທິບໍດີຟິລິບປິນໄດ້ສະແດງຄວາມຍິນດີຕໍ່ລັດຖະບານແລະພັກກອມມູນິດທີ່ຟື້ນຟູການເຈລະຈາສັນຕິພາບເປັນທາງການຄືນໃໝ່ໂດຍທ່ານອາເບລາ ໂຄສົກທຳນຽບປະທານາທິບໍດີຟິລິບປິນກ່າວວ່າ,ທຳນຽບປະທານາທິບໍດີຫວັງໃຫ້ຜູ້ນຳພັກກອມມູນິດຈະສາມາດຈຳກັດກອງປະກອບອາວຸດຂອງຕົນແລະຮ່ວມມືກັບລັດຖະບານເພື່ອກ້າວສູ່ການເຊັນສັນຍາສັນຕິພາບ.