ສະກອດແລນອັງກິດຫວັງລົງປະຊາມະຕິສະແຫວງຫາຄວາມເປັນເອກະລາດເທື່ອທີສອງ

ທ່ານນາງນິໂຄລາສະເຕີເຈັນ ຫົວໜ້າລັດຖະມົນຕີສະກອດແລນອັງກິດຢືນຢັນຕໍ່ສື່ມວນຊົນຢູ່ເມືອງເອດິງເບີກໃນວັນທີ 13 ມີນານີ້ວ່າ: ຫວັງຈະຈັດການລົງປະຊາມະຕິອີກຄັ້ງໜຶ່ງເພື່ອສະແຫວງຫາຄວາມເປັນເອກະລາດຫຼືບໍ່ໃນປີ 2018ຫຼືປີ 2019.

ພາຍຫຼັງອອກມາຢືນຢັນຄືດັ່ງກ່າວກໍຖືກພັກການເມືອງສຳຄັນຈຳນວນໜຶ່ງຂອງສະກອດແລນຕຳໜິໂດຍພັກກຳມະກອນ, ພັກອະນຸລັກນິຍົມແລະພັກເສລີປະຊາທິປະໄຕລ້ວນແຕ່ຄັດຄ້ານຕໍ່ການລົງປະຊາມະຕິເທື່ອທີສອງ.

ແນວໃດກໍດີ,ທ່ານນາງສະເຕີເຈັນກໍໄດ້ສະເໜີວັນເວລາຈັດການລົງປະຊາມະຕິເທື່ອທີສອງແລ້ວ, ຂະນະທີ່ໂຄສົກລັດຖະບານອັງກິດຢືນຢັນທັນທີວ່າ ຜົນການລົງປະຊາມະຕິກ່ຽວກັບຄວາມເປັນເອກະລາດຂອງສະກອດແລນເມື່ອປີ2014 ໄດ້ສະແດງໃຫ້ເຫັນຢ່າງຈະແຈ້ງວ່າ ຊາວສະກອດແລນສ່ວນໃຫຍ່ບໍ່ບໍ່ຕ້ອງການໃຫ້ລົງປະຊາມະຕິເທື່ອທີສອງ ເພາະຈະເຮັດໃຫ້ປະເທດຊາດແຕກແຍກ ແລະການພັດທະນາເສດຖະກິດກໍຈະບໍ່ແນ່ນອນເພີ່ມຫຼາຍຂຶ້ນ.