ຕາມຂ່າວCRI: ຕໍ່ກໍລະນີທີ່ສ.ເກົາຫຼີ ແລະອາເມລິກາໄດ້ຊ້ອມຮົບຮ່ວມໃນລະຫັດ "ຄວາມຕັດສິນໃຈສຳຄັນ" ໃນວັນທີ 13 ມີນານີ້, ທ່ານນາງຮວາຊຸນຢິງ ໂຄສົກກະຊວງການຕ່າງປະເທດຈີນກ່າວທີ່ນະຄອນຫຼວງປັກກິ່ງໃນມື້ດຽວກັນວ່າ, ປັດຈຸບັນ, ສະຖານະການແຫຼມເກົາຫຼີອ່ອນໄຫວແລະສັບສົນຫຼາຍ, ບັນດາຝ່າຍທີ່ກ່ຽວຂ້ອງຄວນເຮັດເລື່ອງທີ່ເປັນຜົນດີຊ່ວຍຊຸກຍູ້ໃຫ້ສະຖານະການຜ່ອນຄາຍລົງ ແລະປົກປັກຮັກສາສັນຕິພາບກໍຄືສະຖຽນລະພາບຂອງພາກພື້ນ. ທ່ານໄດ້ກ່າວຢ້ຳຄວາມຄິດໃນການແກ້ໄຂບັນຫາແຫຼມເກົາຫຼີຂອງຈີນ ຄື ໃຫ້ແຫຼມເກົາຫຼີປອດນິວເຄຼຍ ແລະຢຸດການກະທຳທີ່ບໍ່ມີຜົນດີແລ້ວເລີ່ມເຂົ້າສູ່ການເຈລະຈາສັນຕິພາບ ແລະຂໍ້ສະເໜີ"ສອງຝ່າຍຕ້ອງຢຸດເຊົາ" ທີ່ໃຫ້ ສປປ ເກົາຫຼີຢຸດການທົດລອງອາວຸດນິວເຄຼຍ, ຂະນະທີ່ອາເມລິກາ ແລະ ສ.ເກົາຫຼີກໍຕ້ອງຢຸດການຊ້ອມຮົບຮ່ວມຂະໜາດໃຫຍ່.
ທ່ານນາງຮວາຊຸນຢິງກ່າວໃນພິທີຖະແຫຼງຂ່າວທີ່ຈັດຂຶ້ນໃນວັນທີ 13 ມີນານີ້ວ່າ, ຫວັງໃຫ້ບັນດາຝ່າຍທີ່ກ່ຽວຂ້ອງຄວນພິຈາລະນາແລະຄົ້ນຄວ້າຂໍ້ສະເໜີຂອງຈີນຢ່າງຈິງຈັງ ໂດຍພິຈາລະນາເຖິງການປົກປັກຮັກສາສັນຕິພາບແລະສະຖຽນລະພາບຂອງແຫຼມເກົາຫຼີ ແລະເຮັດໃຫ້ແຫຼມເກົາຫຼີປອດນິວເຄຼຍ ແລະໃຫ້ການຕອບຮັບຢ່າງສ້າງສັນ.
 |
