ຜູ້​ສະໝັກ​ຮັບ​ເລືອກ​ຕັ້ງປະທານາທິບໍດີ​ຝຣັ່ງຖືກ​ສືບສວນ-ສອບ​ສວນ​​ຢ່າງ​ເປັນ​ທາງ​ການ
2017-03-15 10:53:47  cri 

ທ່ານຟຣັງ​ຊົວ ຟິອົງ ຜູ້​ສະໝັກ​ຮັບ​ເລືອກ​ຕັ້ງປະທານາທິບໍດີ​​ສັງກັດ​ພັກສາທາລະນະ​ລັດ ພັກ​ຝ່າຍ​ຂວາ​ຝຣັ່ງ ​ໄດ້​ຖືກ​ອົງການ​ຕຸລາການ​ສືບສວນ-ສອບ​ສວນ​ດຳ​ເນີນ​ຄະດີ​ຢ່າງ​ເປັນ​ທາງ​ການ​ໃນ​ວັນ​ທີ 14 ມີນາ​ນີ້ ​ໂດຍ​ໃນ​ວັນ​ດັ່ງກ່າວ, ອົງການ​ຕຸລາການ​ຝຣັ່ງ​ໄດ້ຮຽກ​ສອບ​ຖາມ​ທັງ​ກ່າວ​ຟ້ອງ​ທ່ານ​ຟິອົງ​ໃນ​ຂໍ້​ຫາ​ຍັກ​ຍອກ​ເງິນຫຼວງ, ຍັກ​ຍອກ​ຊັບ​ ​ແລະ ບໍ່​ໄດ້​ປະຕິບັດ​ພັນທະການ​ແຈ້ງ​ຊັບ​ສິນ​ແລະ​ລາຍ​ຮັບ​ຂອງ​ຕົນ.

ບຸກຄົນ​​ໃນວົງ​ການກົດໝາຍຝຣັ່ງຢືນຢັນ​ວ່າ: ​ໃນ​ຖານະ​ເປັນ​ສະມາຊິກ​ລັດຖະສະພາ, ​ເຖິງ​ວ່າທ່ານຟິອົງ​ຈະ​ຖືກ​ກ່າວ​ຟ້ອງ​ຈາກ​ອົງການ​ຕຸລາການ​ກໍ​ຕາມ, ​ແຕ່​ຈະບໍ່​ຖືກ​ກັກ​ ຫຼື ຈຳກັດ​ອິດສະຫຼະພາບ​ທັນທີ. ຂະນະ​ທີ່ການ​ສື​ບສວນ​-ສອບ​ສວນ​ຢ່າງ​ເປັນ​ທາງ​ການນັ້ນ​ອາດ​ຈະ​ກະທົບ​ຕໍ່​ການ​ສະໜັບສະໜູນ​​ຂອງ​​ປະຊາຊົນທີ່​ມີ​ຕໍ່ທ່ານ, ​ແຕ່​ຈະ​ບໍ່​ມີ​ຜົນ​ສະທ້ອນ​​ໃນ​ການ​ສືບ​ຕໍ່​ສະໝັກ​ຮັບ​ເລືອກ​ຕັ້ງ​ແຕ່​ຢ່າງ​ໃດ.

​ເດືອນ​ມັງກອນ​ປີ​ນີ້, ສື່​ມວນ​ຊົນ​ຝຣັ່ງ​ໄດ້​ລາຍ​ງານ​ວ່າ ພັນ​ລະ​ຍາ​ຂອງ​ທ່ານ​ຟິອົງ​ມີ​ເງິນ​ເດືອນ​ໃນ​ນາມ​ຜູ້​ຊ່ວຍ​ສະມາຊິກ​ສະພາ, ​ແຕ່​ພັດ​ບໍ່​​​ໄດ້​ເຮັດ​ວຽກ​ຢ່າງ​ແທ້​ຈິງ ສົ່ງ​ຜົນ​ເຮັດ​ໃຫ້​ປະຊາຊົນ​ທີ່ສະໜັບສະໜູນ​ທ່ານ​ຟິອົງມີ​ອັດຕາຫຼຸດລົງ​ຢ່າງຫຼວງຫຼາຍ.

ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ