ຂປລ.ໃນວັນທີ 14 ມີນາ 2017 ທີ່ນະຄອນຫລວງວຽງຈັນ, ໄດ້ຈັດກອງປະຊຸມ ປະສານງານເພື່ອການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ， ໂດຍການເປັນທານຂອງທ່ານ ອານຸພາບ ວົງໜໍ່ແກ້ວ， ຫົວໜ້າກົມອົງການຈັດຕັ້ງສາກົນ, ທັງເປັນຫົວໜ້າກອງເລຂາ ຄະນະຊີ້ນຳລະດັບຊາດ ເພື່ອການຈັດຕັ້ງປະຕິບັດເປົ້າໝາຍ ການພັດທະນາແບບຍືນຍົງ, ມີທ່ານ ນາງ ພອນວັນ ອຸທະວົງ ຫົວໜ້າກົມແຜນການ ກະຊວງແຜນການ ແລະ ການລົງທຶນ ແລະຫົວໜ້າຫ້ອງການສູນສະຖິຕິແຫ່ງຊາດ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໃນໂອກາດດັ່ງກ່າວ, ທ່ານ ອານຸພາບ ວົງໜໍ່ແກ້ວ ໄດ້ໃຫ້ຮູ້ວ່າ: ກອງປະຊຸມດັ່ງກ່າວ, ຜູ້ເຂົ້າຮ່ວມຈະໄດ້ມີການສົນທະນາປືກສາຫາລື, ປະກອບຄຳຄິດເຫັນ ຢ່າງກົງໄປກົງມາ ກ່ຽວກັບການປັບປຸງກົນໄກການປະສານງານ ແລະ ການຈັດຕັ້ງປະຕິບັດເປົ້າໝາຍ ການພັດທະນາແບບຍືນຍົງ ໃນແຕ່ລະຂະແໜງການ ພ້ອມໃຫ້ມີຄວາມສອດຄ່ອງ ກັບແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 8, ຍຸດທະສາດການພັດທະນາ ປີ 2025 ແລະ ວິໄສທັດປີ 2030.
ກອງປະຊຸມດັ່ງກ່າວ, ແມ່ນເພື່ອຕິດຕາມ ການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ ທີ່ຜ່ານມາ ແລະ ປືກສາຫາລື ກ່ຽວກັບກົນໄກການປະສານງານ ການຈັດຕັ້ງປະຕິບັດເປົ້າໝາຍການພັດທະນາ ແບບຍືນຍົງ ໃນຕໍ່ໜ້າ ໃຫ້ແທດເໝາະກັບເງື່ອນໄຂ ແລະ ສະພາບການຕົວຈິງໃນ ສປປ ລາວ, ລວມທັງພິຈາລະນາບັນດາຕົວຊີ້ວັດແຫ່ງຊາດ ຂອງເປົ້າໝາຍການພັດທະນາແບບຍືນຍົງ ແລະ ເນື້ອໃນຮ່າງຂໍ້ຕົກລົງ ວ່າດ້ວຍການແຕ່ງຕັ້ງຄະນະຊີ້ນຳລະດັບຊາດ ເພື່ອການຈັດຕັ້ງປະຕິບັດເປົ້າໝາຍການພັດທະນາ ແບບຍືນຍົງ, ຄະນະວິຊາການທີ່ເປັນຈຸດປະສານງານ ແລະ ກອງເລຂາຄະນະຊີ້ນຳລະດັບຊາດ ເພື່ອເປັນນິຕິກຳໃຫ້ແກ່ການ ປະຕິບັດໜ້າທີ່ ແນໃສ່ຮັບປະກັນການ ເປັນເສນາທິການໃຫ້ແກ່ ລັດຖະບານ ພ້ອມທັງປະສານສົມທົບ ກັບບັນດາຄູ່ຮ່ວມມືທັງພາຍໃນ ແລະ ຕ່າງປະເທດ ໃນການຊຸກຍູ້ຕິດຕາມ ແລະ ລາຍງານກ່ຽວກັບຄວາມຄືບໜ້າ ຂອງການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງໃນ ສປປ ລາວ ໃຫ້ໄດ້ຮັບຜົນສຳເລັດເປັນຢ່າງດີ.
 |
