ວັນທີ 15 ມີນານີ້, ທ່ານຫຼິວເຈຢີ່ ຜູ້ຕາງໜ້າຖາວອນຂອງຈີນປະຈຳອົງການສະຫະປະຊາຊາດໄດ້ກ່າວຮຽກຮ້ອງໃຫ້ເພີ່ມທະວີການຕໍ່ຕ້ານການຄ້າມະນຸດແລະບັນຫາກຸລີຢູ່ເຂດເກີດການປະທະກັນພ້ອມທັງເພີ່ມທະວີການຮ່ວມມືສາກົນເພື່ອແກ້ໄຂບັນຫາເຫຼົ່ານີ້.
ສະພາຄວາມໝັ້ນຄົງອົງການສະຫະປະຊາຊາດໄດ້ຈັດກອງປະຊຸມເປີດກວ້າງກ່ຽວກັບການຄ້າມະນຸດແລະບັນຫາກຸລີຢູ່ເຂດເກີດການປະທະກັນດ້ວຍກຳລັງອາວຸດໃນວັນທີ 15 ມີນານີ້ແລະໃນໂອກາດປະກອບຄຳຄິດເຫັນ, ທ່ານຫຼິວເຈຢີ່ ຜູ້ຕາງໜ້າຖາວອນຂອງຈີນປະຈຳອົງການສະຫະປະຊາຊາດໄດ້ກ່າວວ່າ, ຈີນເດັດດ່ຽວຄັດຄ້ານການຄ້າມະນຸດທຸກຮູບແບບໃນຂະນະທີ່ເກີດການປະທະກັນດ້ວຍກຳລັງອາວຸດ ແລະສະໜັບສະໜູນປະຊາຄົມໂລກພະຍາຍາມຮ່ວມກັນເພື່ອແກ້ໄຂບັນຫາດັ່ງກ່າວ.
ນອກນີ້, ທ່ານຫຼິວເຈຢີ່ຍັງຮຽກຮ້ອງໃຫ້ເອົາໃຈໃສ່ຕໍ່ຕ້ານລັດທິກໍ່ການຮ້າຍພ້ອມທັງເພີ່ມຄວາມພະຍາຍາມແກ້ໄຂການປະທະກັນດ້ວຍວິທີທາງການເມືອງ ແລະຈີນຈະສືບຕໍ່ສະໜັບສະໜູນປະຊາຄົມໂລກໃຊ້ນະໂຍບາຍຢ່າງເດັດຂາດຕໍ່ການຄ້າມະນຸດແລະບັນຫາກຸລີຢູ່ເຂດປະທະກັນດ້ວຍກຳລັງອາວຸດ ທັງເພີ່ມທະວີການປົກປ້ອງສິດຂອງແມ່ຍິງແລະເດັກນ້ອຍຢູ່ເຂດປະທະກັນ ເພື່ອຮ່ວມກັນປົກປັກຮັກສາສັນຕິພາບ,ຄວາມໝັ້ນຄົງ,ສະຖຽນລະພາບແລະການພັດທະນາຂອງໂລກແລະພາກພື້ນ.