ຄຽງຄູ່ກັບການກໍ່ສ້າງໃນຂອບ "ໜຶ່ງແລວທາງໜຶ່ງເສັ້ນທາງ" ໄດ້ເຂົ້າສູ່ລວງເລິກ, ວິທະຍາໄລວິຊາຊີບຫຼາຍແຫ່ງຂອງເຂດກວາງຊີ ສປ ຈີນ ທີ່ຕິດກັບອາຊຽນພວມເພີ່ມທະວີໃນການຍົກລະດັບໃຫ້ນັກສຶກສາອາຊຽນທີ່ມາສຶກສາຕໍ່ຢູ່ເຂດກວາງຊີ ເພື່ອຕອບສະໜອງຕາມຄວາມຕ້ອງການຂອງວິສາຫະກິດຈີນທີ່ເຂົ້າໄປລົງທຶນແລະພັດທະນາທຸລະກິດຂອງຕົນຢູ່ອາຊຽນ.
ທ່ານເຜິງຕິ້ງເຫວີນ ຮອງຫົວໜ້າຄະນະວິສະວະກຳຈັກໄຟຟ້າແລະລົດຍົນ ວິທະຍາໄລວິຊາຊີບຕົວເມືອງຫຼິວໂຈ່ວກວາງຊີ ກ່າວວ່າ: ໂດຍປະສານສົມທົບກັບວິສາຫະກິດຈີນທີ່ສ້າງຕັ້ງໂຮງງານຢູ່ປະເທດໃນອາຊຽນນັ້ນ, ວິທະຍາໄລຂອງຕົນໄດ້ສຸມໃສ່ຍົກລະດັບເຕັກນິກໃຫ້ແກ່ນັກສຶກສາອາຊຽນ ແລະຊ່ວຍນັກສຶກສາເຫຼົ່ານີ້ປະກອບອາຊີບໃນປະເທດຕົນ, ຂະນະດຽວກັນກໍຈະສາມາດຊ່ວຍວິສາຫະກິດຈີນທີ່ເຂົ້າໄປພັດທະນາຢູ່ບັນດາປະເທດໃນອາຊຽນເຊັ່ນດຽວກັນ.
ປັດຈຸບັນ, ຢູ່ເຂດກວາງຊີໄດ້ສ້າງຕັ້ງສູນອົບຮົມສ້າງບຸກຄະລາກອນອາຊຽນ 5 ແຫ່ງ. ຂະນະທີ່ວິທະຍາໄລເຕັກນິກວິຊາຊີບກະສິກຳກວາງຊີ ກໍໄດ້ຕັ້ງໜ້າປະສານສົມທົບກັບວິສາຫະກິດກະສິກຳກວາງຊີໃນການໄປລົງທຶນແລະພັດທະນາທຸລະກິດຢູ່ປະເທດໃນອາຊຽນ ໂດຍໄດ້ສ້າງຕັ້ງຫ້ອງການທົດລອງແນວພັນຄຸນນະພາບດີຂອງພືດ, ດຳເນີນການຮ່ວມມືລະຫວ່າງວິສາຫະກິດທີ່ສັງກັດວິທະຍາໄລວິຊາຊີບ ແລະ ຮ່ວມສ້າງສູນປະຕິບັດຕົວຈິງການຜະລິດ ໄດ້ເລືອກບົ່ມເພາະແລະແຜ່ຂະຫຍາຍການໃຊ້ແນວພັນພືດ 128 ປະເພດ.
