ຕາມຂ່າວສານຊິນຮວາ: ທ່ານອັນໂທນິໂອ ກູເທີເຣສ໌ ເລຂາທິການໃຫຍ່ອົງການສະຫະປະຊາຊາດໄດ້ອອກຖະແຫຼງການເນື່ອງໃນໂອກາດວັນຄົບຮອບ 6 ປີຂອງການເກີດວິກິດການຊີຣີໂດຍໃນວັນທີ 15 ມີນານີ້ ໄດ້ຮຽກຮ້ອງໃຫ້ປະຊາຄົມໂລກໃຊ້ຄວາມກົດດັນຕໍ່ບັນດາຝ່າຍຂອງຊີຣີ ແລະຊຸກຍູ້ໃຫ້ການເຈລະຈາສັນຕິພາບເຊີແນວກ່ຽວກັບບັນຫາຊີຣີໄດ້ຮັບຜົນສຳເລັດ ເພື່ອຢຸດການປະທະກັນໂດຍໄວ.
ຖະແຫຼງການລະບຸວ່າ, 6 ປີຜ່ານມາ, ປະຊາຊົນຊີຣີເປັນຜູ້ໄດ້ຮັບເຄາະຮ້າຍໃນທ່າມກາງຂອງການປະທະກັນຢ່າງໜັກໜ່ວງທີ່ສຸດໃນສະໄໝນີ້ມາໂດຍຕະຫຼອດ ແລະເນື່ອງໃນໂອກາດການປະທະກັນໄດ້ກ້າວເຂົ້າສູ່ປີທີ 7 , ທ່ານກູເທີເຣສ໌ໄດ້ຮຽກຮ້ອງໃຫ້ບັນດາຝ່າຍທີ່ປະທະກັນປະຕິບັດສອງຂໍ້ໂດຍດ່ວນ ຄືໃຫ້ປະຕິບັດຕາມສັນຍາຢຸດຍິງທີ່ຕົກລົງກັນ ແລະໃຫ້ເກີດຜົນເປັນຈິງໃນວັນທີ 30 ທັນວາ 2016 ແລະຮັບປະກັນໃຫ້ການຊ່ວຍເຫຼືອດ້ານມະນຸດສະທຳສາມາດຊ່ວຍເຫຼືອໄດ້ຕາມຄວາມຕ້ອງການຂອງປະຊາຊົນຊີຣີ.
ນັບແຕ່ຊີຣີເກີດການປະທະກັນໃນເດືອນມີນາ 2011 ເປັນຕົ້ນມາ, ໄດ້ເຮັດໃຫ້ມີຄົນເສຍຊີວິດ 3 ແສນກວ່າຄົນ, ປະຊາກອນເຄິ່ງໜຶ່ງຂອງຊີຣີຕ້ອງພັດຖິ່ນ ແລະ 13 ລ້ານ 5 ແສນຄົນຕ້ອງການການຊ່ວຍເຫຼືອດ້ານມະນຸດສະທຳ.
 |
