ທ່ານຈ່າງກ່າວລີ້ ກຳມະການປະຈຳກົມການເມືອງສູນກາງພັກກອມມູນິດຈີນ, ຮອງນາຍົກລັດຖະມົນຕີຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານຄາມາ ຈາເວັດ ບາເຈວາ ຫົວໜ້າກົມໃຫຍ່ເສນາທິການກອງທັບບົກປາກິສະຖານຢູ່ນະຄອນຫຼວງປັກກິ່ງໃນຕອນເຊົ້າວັນທີ 16 ມີນານີ້.
ໂອກາດດັ່ງກ່າວ, ທ່ານຈ່າງກ່າວລີ້ຢືນຢັນວ່າ ຈີນ-ປາກິສະຖານເປັນຄູ່ຮ່ວມມືຍຸດທະສາດຕະຫຼອດການໂດຍເຫັນໄດ້ຈາກໃນຊຸມປີມໍ່ໆມານີ້, ສາຍພົວພັນລະຫວ່າງສອງປະເທດໄດ້ກ້າວໜ້າຂະຫຍາຍຕົວຢ່າງວ່ອງໄວ, ການນຳຂັ້ນສູງສອງປະເທດໄປມາຫາສູ່ກັນເລື້ອຍໆ, ຄວາມໄວ້ເນື້ອເຊື່ອໃຈກັນທາງຍຸດທະສາດໄດ້ເພີ່ມທະວີຂຶ້ນເປັນປະຈຳ, ສອງຝ່າຍຮ່ວມມືແບບຕ່າງຝ່າຍຕ່າງມີຜົນປະໂຫຍດໃນການຊຸກຍູ້ການກໍ່ສ້າງ "ໜຶ່ງແລວທາງໜຶ່ງເສັ້ນທາງ", ການຮ່ວມມືຕົວຈິງໃນຂົງເຂດຕ່າງໆໄດ້ຮັບຜົນສຳເລັດໃໝ່. ສອງຝ່າຍໄດ້ປະຕິບັດຕາມຄວາມເປັນເອກະພາບກັນຂອງຜູ້ນຳສອງປະເທດທີ່ໄດ້ຕົກລົງຮ່ວມກັນ ໂດຍໄດ້ຮັກສາການໄປມາຫາສູ່ກັນລະຫວ່າງການນຳຂັ້ນສູງ, ຊຸກຍູ້ການກໍ່ສ້າງແລວທາງເສດຖະກິດຈີນ-ປາກິສະຖານຢ່າງເປັນລະບຽບຕາມຫຼັກວິທະຍາສາດ, ເພີ່ມທະວີການຮ່ວມມືດ້ານການປ້ອງກັນຊາດ, ປະສານສົມທົບຢ່າງໃກ້ຊິດໃນວຽກງານສາກົນກໍຄືພາກພື້ນ ແລະຊຸກຍູ້ສາຍພົວພັນຈີນ-ປາກິສະຖານຂະຫຍາຍຕົວຂຶ້ນສູ່ລະດັບສູງໃໝ່.
ທ່ານບາເຈວາຢືນຢັນວ່າ ກອງທັບປາກິສະຖານເປັນຜູ້ສະໜັບສະໜູນສາຍພົວພັນມິດຕະພາບປາກິສະຖານ-ຈີນຢ່ງເດັດດ່ຽວໜຽວແໜ້ນແລະສະເໝີຕົ້ນສະເໝີປາຍທັງໃຫ້ຄວາມສຳຄັນສູງຕໍ່ການກໍ່ສ້າງແລວທາງເສດຖະກິດປາກິສະຖານ-ຈີນ ແລະຈະເດັດດ່ຽວປົກປັກຮັກສາຄວາມໝັ້ນຄົງຂອງແລວທາງເສດຖະກິດແລະຮັບປະກັນໃຫ້ແກ່ການກໍ່ສ້າງແລວທາງເສດຖະກິດມີຄວາມຄືບໜ້າເປັນຢ່າງດີ.