"ຄວາມຝັນແຫ່ງອັງກໍວັດ ງານວາງສະແດງຮູບພາບທີ່ຖ່າຍໂດຍທ່ານເສີນຫຼີເຊິງ" ໄດ້ຈັດຂຶ້ນໃນວັນທີ 16 ມີນານີ້ຢູ່ນະຄອນຫຼວງປັກກິ່ງ ສປ ຈີນ ແລະຈະດຳເນີນເປັນເວລາ 16 ວັນ ໂດຍສຳນັກພິມຈຳໜ່າຍຮູບພາບຈີນ, ຫໍວິຈິດສິນທັດສະນີຍະພາບ ວັດທະນະທຳ ແລະ ສວນອຸທິຍານ ເປັນຜູ້ຈັດ ແລະ ສະຖານທູດຈີນປະຈຳກຳປູເຈຍ ຊ່ວຍປະສານງານ, ຂະນະທີ່ທ່ານເຄັກ ສີໂຊດາ ເອກອັກຄະລັດຖະທູດກຳປູເຈຍປະຈຳຈີນໄດ້ຂຽນຄຳເຫັນໃນງານວາງສະແດງ ທັງເຂົ້າຮ່ວມພິທີເປີດສາກອີກດ້ວຍ.
ທ່ານເສີນຫຼີເຊິງ ແມ່ນຜູ້ຊ່ວຍຫົວໜ້າຫໍພິພິທະພັນແຫ່ງຊາດຈີນ ເຊິ່ງກ່ອນໜ້ານີ້ ຄື ເດືອນຕຸລາປີ 2016, ທ່ານໄດ້ເດີນທາງທັດສະນະສຶກສາຫໍພິພິທະພັນແລະຮ່ອງຮອຍວັດທະນະທຳປະຫວັດສາດກຳປູເຈຍ ແລະໄດ້ບັນທຶກຮູບພາບຕ່າງໆຂອງປະເທດດັ່ງກ່າວ, ສ່ວນຜົນງານຮູບພາບ 140 ພາບທີ່ນຳມາວາງສະແດງເທື່ອນີ້ໄດ້ຄັດເລືອກຈາກກວ່າ 6.000 ພາບ ເຊິ່ງຮູບພາບຕ່າງໆນີ້ໄດ້ສະແດງໃຫ້ເຫັນເຖິງສະພາບປັດຈຸບັນຂອງກຸ່ມສະຖາປັດຕະຍະກຳທີ່ກໍ່ສ້າງໃນສະໄໝລາຊະວົງອັງກໍ ທັງໄດ້ສະແດງໃຫ້ເຫັນເຖິງຄວາມຮຸ່ງເຮືອງຂອງປະຫວັດສາດ ແລະ ຫົວຄິດປະດິດສ້າງອັນເລີດລ້ຳຂອງຊົນເຜົ່າຂະແໝ.
ທ່ານສີໂຊດາ ເອກອັກຄະລັດຖະທູດກຳປູເຈຍປະຈຳຈີນ ໄດ້ກ່າວໃນພິທີເປີດງານວາງສະແດງດັ່ງກ່າວວ່າ: ງານວາງສະແດງຄັ້ງນີ້ມີຄວາມໝາຍເປັນພິເສດຕໍ່ການຊຸກຍູ້ໄມຕີຈິດມິດຕະພາບລະຫວ່າງກຳປູເຈຍ-ຈີນ ກໍຄືການຖອດຖອນ ແລກປ່ຽນວັດທະນະທຳລະຫວ່າງສອງຊາດ.
