ກິດຈະກຳ "ປີແຫ່ງການຮ່ວມມືດ້ານການທ່ອງທ່ຽວຈີນ-ອາຊຽນ" 2017 ໄດ້ໄຂຂຶ້ນຢູ່ນະຄອນຫຼວງມະນີລາປະເທດຟີລິບປິນໃນວັນທີ 16 ມີນານີ້ ແລະໃນໂອກາດດັ່ງກ່າວ,ທ່ານ ຫຼີເຄີ້ສຽງ ນາຍົກລັດຖະມົນຕີຈີນ ແລະ ທ່ານ ໂຣດຣີໂກ ດູເຕີເຕ ປະທານາທິບໍດີຟີລິບປິນຕ່າງກໍໄດ້ສົ່ງຄຳຊົມເຊີຍຕໍ່ພິທີດັ່ງກ່າວ.
ທ່ານ ຫຼີເຄີ້ສຽງ ກ່າວວ່າ: ຈີນຖືອາຊຽນເປັນບູລິມະສິດທາງການທູດ, ສະໜັບສະໜູນຖານະໃຈກາງຂອງອາຊຽນໃນການຮ່ວມມືຂອງພາກພື້ນ ທັງຍິນດີສືບຕໍ່ຍຶດໝັ້ນຄວາມເຄົາລົບກັນ,ຄວາມເຂົ້າໃຈກັນ,ຄວາມໄວ້ເນື້ອເຊື່ອໃຈກັນແລະການສະໜັບສະໜູນກັນ, ລົງເລິກຄວາມຮັບຮູ້ທີ່ເປັນເອກະພາບຢ່າງບໍ່ຢຸດຢັ້ງ, ນຳໃຊ້ໂອກາດການພັດທະນາ, ຮ່ວມມືສ້າງປະຊາຄົມຮ່ວມຊະຕາກຳຈີນ-ອາຊຽນໃຫ້ແໜ້ນແຟ້ນກວ່າເກົ່າ ເພື່ອຊຸກຍູ້ສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນກໍຄືຂອງໂລກ. ທ່ານ ຫຼີເຄີ້ສຽງ ກ່າວຕື່ມວ່າ: ການຮ່ວມມືດ້ານການທ່ອງທ່ຽວແມ່ນເນື້ອໃນສຳຄັນໃນການແລກປ່ຽນແລະການຮ່ວມມືດ້ານວັດທະນະທຳລະຫວ່າງຈີນກັບອາຊຽນ, ໄດ້ເພີ່ມທະວີຄວາມເຂົ້າໃຈກັນແລະເພີ່ມທະວີນ້ຳໃຈມິດຕະພາບລະຫວ່າງປະຊາຊົນສອງປະເທດ ແລະໄດ້ຊຸກຍູ້ການຮ່ວມມືທີ່ແທ້ຈິງລະຫວ່າງສອງຝ່າຍໃນຂົງເຂດຕ່າງໆ. ຈີນໄດ້ກາຍເປັນປະເທດແຫຼ່ງນັກທ່ອງທ່ຽວທີ່ໃຫຍ່ອັນດັບໜຶ່ງຂອງອາຊຽນ.
ທ່ານ ດູເຕີເຕ ກ່າວວ່າ: ປີ 2016 ແມ່ນປີແຫ່ງການສ້າງສາຍພົວພັນຄູ່ເຈລະຈາລະຫວ່າງອາຊຽນ-ຈີນຄົບຮອບ 25 ປີ. ສາຍພົວພັນລະຫວ່າງສອງຝ່າຍໄດ້ຮັບຄວາມຊົມເຊີຍຢ່າງກວ້າງຂວາງ,ການຮ່ວມມືຖືກກັບກາລະເທສະ ໄດ້ສົ່ງສັນຍານຢ່າງຈະແຈ້ງຕໍ່ພາຍນອກທີ່ຈະຮ່ວມກັນພະຍາຍາມບັນລຸເປົ້າໝາຍອັນໃຫຍ່ຫຼວງໃນໄລຍະຍາວຕໍ່ໄປ.