ທ່ານສະຕິຟ ໂຈໂບ ລັດຖະມົນຕີກະຊວງການຄ້າ,ທ່ອງທ່ຽວແລະການລົງທຶນອົສຕຣາລີຢືນຢັນເມື່ອມໍ່ໆນີ້ວ່າ: ວິສາຫະກິດອົສຕຣາລີມີຄວາມສົນໃຈຢ່າງຍິ່ງແລະຍິນດີເຂົ້າຮ່ວມການກໍ່ສ້າງ "ໜຶ່ງແລວທາງໜຶ່ງເສັ້ນທາງ"ທີ່ຈີນກຳລັງຊຸກຍູ້ປະຕິບັດນັ້ນ ພ້ອມດຽວກັນນັ້ນ, ທ່ານຍິນດີຕ້ອນຮັບວິສາຫະກິດຈີນມາລົງທຶນຢູ່ອົສຕຣາລີ.
ທ່ານໂຈໂບກ່າວໃນເວລາໃຫ້ສຳພາດຕໍ່ນັກຂ່າວວ່າ: ຂໍ້ລິເລີ່ມດັ່ງກ່າວຂອງລັດຖະບານຈີນມີຈຸດປະສົງເພື່ອສ້າງຕັ້ງສາຍພົວພັນຮ່ວມມືລະຫວ່າງເອີຣົບ-ອາຊີ ເຊິ່ງຈະສ້າງ ໂອກາດການຄ້າຢ່າງໃຫຍ່ຫຼວງ. ດ້ວຍເຫດນີ້, ວິສາຫະກິດອົສຕຣາລີຈິ່ງມີຄວາມສົນໃຈຢ່າງຍິ່ງໃນການມີສ່ວນຮ່ວມ.
ທ່ານໂຈໂປກ່າວຕື່ມວ່າ: ໃນຊຸມປີມໍ່ໆມານີ້, ການພົວພັນດ້ານເສດຖະກິດການຄ້າລະຫວ່າງອົສຕຣາລີ-ຈີນໄດ້ຂະຫຍາຍຕົວຢ່າງຫຼວງຫຼາຍໂດຍສະເພາະນັບແຕ່ສອງປະເທດໄດ້ລົງນາມໃນສັນຍາການຄ້າເສລີເປັນຕົ້ນມາ ໄດ້ມີການພັດທະນາຢ່າງວ່ອງໄວທີ່ສຸດ ແລະທັງສອງຝ່າຍກໍໄດ້ຮັບຜົນປະໂຫຍດຢ່າງຫຼວງຫຼາຍ. ຂະນະທີ່ຫຼັງສັນຍາການຄ້າເສລີເກີດມີຜົນສັກສິດ, ອົສຕຣາລີກໍໄດ້ເພີ່ມການລົງທຶນຕໍ່ຈີນຢ່າງແຂງແຮງເຊັ່ນກັນ. ພ້ອມດຽວກັນນັ້ນ, ອົສຕຣາລີປະຕິບັດທ່າທີເປີດປະຕູຕໍ່ທຶນຕ່າງປະເທດແລະຍິນດີຕ້ອນຮັບວິສາຫະກິດປະເທດຕ່າງໆເຊິ່ງລວມທັງຈີນມາລົງທຶນຢູ່ປະເທດຕົນ.
ຕົວເລກສະຖິຕິຂອງກະຊວງການຄ້າຈີນສະແດງໃຫ້ເຫັນວ່າ ນັບແຕ່ໄຕມາດທີໜຶ່ງຫາທີ 3 ຂອງປີ 2016 ຜ່ານມາ, ຈີນລົງທຶນໂດຍກົງຢູ່ອົສຕຣາລີໄດ້ເພີ່ມຂຶ້ນ 73,3% ເມື່ອທຽບໃສ່ໄລຍະດຽວກັນຂອງປີ 2015. ຂະນະທີ່ບົດລາຍງານສຳຫຼວດການຄ້າສາກົນອົສຕຣາລີ 2016 ກໍສະແດງໃຫ້ເຫັນວ່າ: ການລົງທຶນຈາກຕ່າງປະເທດຢູ່ອົສຕຣາລີ 21% ມາຈາກຈີນ ແລະຈີນໄດ້ກາຍເປັນປະເທດຍອດນິຍົມລົງທຶນສຳລັບວິສາຫະກິດອົສຕຣາລີເປັນ 3 ປີຕິດຕໍ່ກັນ.