ວັນທີ 18 ມີນານີ້, ທ່ານຫວາງອີ້ ລັດຖະມົນຕີກະຊວງການຕ່າງປະເທດຈີນໄດ້ເຈລະຈາກັບທ່ານເຣກສ໌ ຕີວເລີຊັນ ລັດຖະມົນຕີການຕ່າງປະເທດອາເມລິກາທີ່ມາຢ້ຽມຢາມຈີນ.
ທ່ານຫວາງອີ້ຍິນດີຕ້ອນຮັບທ່ານຕີວເລີຊັນຢ້ຽມຢາມຈີນ ແລະ ກ່າວວ່າ, ນັບແຕ່ທ່ານປະທານາທິບໍດີໂດນັບ ທຣຳຂຶ້ນດຳລົງຕຳແໜ່ງມານີ້, ພາຍໃຕ້ຄວາມພະຍາຍາມຂອງສອງຝ່າຍ, ການພົວພັນຈີນ-ອາເມລິກາກຳລັງຂະຫຍາຍໄປສູ່ທິດທາງຕັ້ງໜ້າຢ່າງໜັກແໜ້ນ. ທ່ານຫວາງອີ້ກ່າວເນັ້ນວ່າ, ຈີນ ກັບ ອາເມລິກາຄວນແລກປ່ຽນຄວາມຄິດຄວາມເຫັນ ແລະ ປະສານສົມທົບກັນຢ່າງໃກ້ຊິດ, ເພື່ອຮັບປະກັນການໄປມາຫາສູ່ລະຫວ່າງປະມຸກລັດ ແລະ ເຈົ້າໜ້າທີ່ຂັ້ນຕ່າງໆຂອງສອງປະເທດດຳເນີນໄປຢ່າງສະດວກ ແລະ ໄດ້ຮັບໝາກຜົນທີ່ອຸດົມສົມບູນ.
ທ່ານຫວາງອີ້ໄດ້ບັນລະຍາຍຫຼັກການ ແລະ ຫຼັກໝັ້ນຂອງຈີນກ່ຽວກັບບັນຫາໄຕ້ຫວັນ ແລະ ທະເລຈີນໃຕ້ໂດຍກ່າວເນັ້ນວ່າ, ສອງຝ່າຍຕ້ອງເຄົາລົບຜົນປະໂຫຍດແກນກາງ ແລະ ຄວາມສົນໃຈອັນສຳຄັນເຊິ່ງກັນແລະກັນ, ແກ້ໄຂບັນຫາອ່ອນໄຫວຢ່າງເໝາະສົມເພື່ອປ້ອງກັນບໍ່ໃຫ້ການພົວພັນຈີນ-ອາເມລິກາຖືກກະທົບກະເທືອນໂດຍບໍ່ຈຳເປັນ.
ທ່ານຕີວເລີຊັນກ່າວວ່າ, ນັບແຕ່ອາເມລິກາ ກັບ ຈີນສ້າງສາຍສຳພັນທາງການທູດເກືອບ 40 ປີມານີ້, ການພົວພັນລະຫວ່າງສອງປະເທດໄດ້ຮັບຜົນສຳເລັດອັນໃຫຍ່ຫຼວງ. ໂດຍປະເຊີນໜ້າກັບສະຖານະການສາກົນທີ່ປ່ຽນແປງເລື້ອຍໆ ອາເມລິກາ ກັບ ຈີນຕ້ອງປະສານສົມທົບກັນຢ່າງໃກ້ຊິດກວ່າເກົ່າ.
ສອງຝ່າຍຍັງໄດ້ແລກປ່ຽນຄວາມຄິດຄວາມເຫັນຕໍ່ສະຖານະການແຫຼມເກົາຫຼີໃນປັດຈຸບັນ ແລະ ບັນຫາຕ່າງໆທີ່ສົນໃຈນຳກັນ. ທ່ານຫວາງອີ້ກ່າວຢ້ຳວ່າ, ຈີນຄັດຄ້ານອາເມລິກາຈັດຕັ້ງລະບົບຕ້ານລູກສອນໄຟນຳວິຖີ "ທາດ" ຢູ່ສ.ເກົາຫຼີ.