ຕອນເຊົ້າວັນທີ 22 ມີນານີ້, ຢູ່ເຂດທະເລທາງພາກຕາເວັນອອກສຽງໃຕ້ເທດສະບານແຂວງບາຫຼີປະເທດອິນໂດເນເຊຍໄດ້ເກີດແຜ່ນດິນໄຫວລະດັບ 6,4 ລິກເຕີ ແລະຫຼັງເກີດເຫດມາຮອດປັດຈຸບັນຍັງບໍ່ມີການລາຍງານຜົນເສຍຫາຍຕໍ່ຊີວິດແລະຊັບສິນແຕ່ປະການໃດ.
ເວັບໄຊກົມອຸຕຸນິຍົມ,ດິນຟ້າອາກາດແລະຟີຊິກພູມສາດປະເທດອິນໂດເນເຊຍໃຫ້ຮູ້ວ່າ: ແຜ່ນດິນໄຫວດັ່ງກ່າວເກີດຂຶ້ນຢູ່ແຂວງບາຫຼີໃນເວລາ 7 ໂມງ 10 ນາທີຕາມເວລາທ້ອງຖິ່ນ ໂດຍໃຈກາງຂອງແຜ່ນດິນໄຫວຢູ່ເຂດທະເລໂກຕາ ເດັນປາຊາ ເທດສະບານແຂວງໄປທາງທິດຕາເວັນອອກສຽງໃຕ້ 23 ກິໂລແມັດ ແລະເລິກລົງໄປ 117 ກິໂລແມັດ. ແນວໃດກໍດີ,ພາກສ່ວນຕິດຕາມວັດແທກແຜ່ນດິນໄຫວປະເທດດັ່ງກ່າວກໍບໍ່ໄດ້ແຈ້ງເຕືອນການເກີດຄື້ນຊຶນະມິຫຼັງແຜ່ນດິນໄຫວຄັ້ງນີ້.
ນອກນີ້, ເວັບໄຊຂໍ້ມູນຂ່າວສານແຜ່ນດິນໄຫວຂອງກົມສຳຫຼວດຂຸດຄົ້ນທໍລະນີສາດອາເມລິກາໃຫ້ຮູ້ວ່າ: ແຜ່ນດິນໄຫວຢູ່ອິນໂດເນເຊຍຄັ້ງນີ້ມີລະດັບ 5,5 ລິກເຕີ ແລະມີຄວາມເລິກຈາກໃຈກາງ 118 ກິໂລແມັດ.