ຕາມຂ່າວສານຊິນຮວາ: ທ່ານປຣະຍຸດ ຈັນໂອຊາ ນາຍົກລັດຖະມົນຕີໄທ ໄດ້ພົບປະເຈລະຈາກັບທ່ານໂຣດຣີໂກ ດູເຕີເຕ ປະທານາທິບໍດີຟີລິບປິນທີ່ພວມຢ້ຽມຢາມໄທທາງລັດຖະກິດໃນວັນທີ 21 ມີນານີ້ ໂດຍສອງຝ່າຍເນັ້ນເຖິງຄວາມຈຳເປັນໃນການປະຕິບັດ "ຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຈີນໃຕ້" ຢ່າງຮອບດ້ານ ແລະສັນຍາວ່າຈະອອກແຮງຊຸກຍູ້ການຮ່າງຂອບ "ກົດແຫ່ງການປະພຶດຢູ່ທະເລຈີນໃຕ້" ໃຫ້ສຳເລັດຜົນໃນປີນີ້.
ທ່ານດູເຕີເຕກ່າວໃນພິທີຖະແຫຼງຂ່າວຮ່ວມທີ່ຈັດຂຶ້ນຫຼັງການພົບປະວ່າ, ປະເທດຕ່າງໆຄວນເຄົາລົບເສລີພາບການເດີນເຮືອແລະເດີນອາກາດຢູ່ທະເລຈີນໃຕ້ ເຊິ່ງເປັນເງື່ອນໄຂພື້ນຖານທີ່ຮັບປະກັນໃຫ້ແກ່ການພັດທະນາຂອງພາກພື້ນ. ຂະນະທີ່ທ່ານປຣະຍຸດກໍກ່າວວ່າ, ການສ້າງທະເລຈີນໃຕ້ເປັນທະເລສັນຕິພາບ, ສະຖຽນລະພາບ ແລະພັດທະນາແບບຍືນຍົງ ແມ່ນເປົ້າໝາຍສູງສຸດຂອງບັນດາປະເທດ ເຊິ່ງມີແຕ່ເຮັດແນວນີ້ຈະສາມາດສ້າງຜົນປະໂຫຍດໃຫ້ແກ່ປະຊາຊົນໃນພາກພື້ນນີ້.
ຜູ້ນຳສອງປະເທດຍັງກ່າວຕື່ມວ່າ, ສອງປະເທດຈະເພີ່ມທະວີການແລກປ່ຽນຂໍ້ມູນຂ່າວສານດ້ານປ້ອງກັນຄວາມສະຫງົບ ແລະຊຸກຍູ້ການລົງນາມໃນສັນຍາຮ່ວມມືດ້ານການຄ້າຂາຍຢາເສບຕິດ ທັງໃຫ້ຄຳໝັ້ນສັນຍາວ່າ ຈະເພີ່ມທະວີບົດບາດຂອງຄະນະກຳມະການການຄ້າ ແລະກົນໄກອື່ນໆ ເພື່ອຊຸກຍູ້ການຮ່ວມມືທາງເສດຖະກິດ, ການຄ້າປະສົມ ແລະການລົງທຶນ.