ຕາມຂ່າວສານຊິນຮວາ: ວັນທີ 21 ມີນານີ້, ກະຊວງການຕ່າງປະເທດຈີນ ໄດ້ຖະແຫຼງຂ່າວຕໍ່ນັກຂ່າວຈີນແລະຕ່າງປະເທດ ໂດຍທ່ານ ເຈີ້ງເຈີກ່ວງ ຮອງລັດຖະມົນຕີກະຊວງດັ່ງກ່າວ ກ່າວວ່າ, ການຢ້ຽມຢາມອົສຕຣາລີຢ່າງເປັນທາງການຂອງທ່ານ ຫຼີເຄີ້ສຽງ ນາຍົກລັດຖະມົນຕີຈີນຄັ້ງນີ້ ຈຸດປະສົງຫຼັກກໍເພື່ອເຂົ້າຮ່ວມການພົບປະປະຈຳປີລະຫວ່າງນາຍົກລັດຖະມົນຕີສອງປະເທດຄັ້ງທີ 5 ແລະຢ້ຽມຢາມນູແວນເຊລັງຢ່າງເປັນທາງການ.
ທ່ານ ເຈີ້ງເຈີກ່ວງ ກ່າວວ່າ, ໃນໂອກາດຢ້ຽມຢາມຄັ້ງນີ້, ທ່ານ ຫຼີເຄີ້ສຽງ ຈະພົບປະເຈລະຈາກັບຜູ້ນຳອົສຕຣາລີແລະນູແວນເຊລັງຢ່າງເລິກເຊິ່ງ ເພື່ອເພີ່ມຄວາມໄວ້ເນື້ອເຊື່ອໃຈກັນດ້ານການເມືອງ, ເປີດກວ້າງການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ຍົກລະດັບການແລກປ່ຽນໃຫ້ສູງຂຶ້ນ, ຊຸກຍູ້ສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງຈີນກັບສອງປະເທດດັ່ງກ່າວໃຫ້ຂະຫຍາຍຕົວຕື່ມອີກ ແລະສ້າງຄວາມສຸກໃຫ້ແກ່ປະຊາຊົນທັງສາມປະເທດໃຫ້ດີກວ່າເກົ່າ.
ແນວໃດກໍດີ, ໃນຂະນະທີ່ປັດຈຸບັນ ເສດຖະກິດໂລກຂາດກຳລັງໃນການຟື້ນຟູ, ລັດທິປົກປ້ອງແລະແນວຄິດ 'ຝືນກັບໂລກາພິວັດ' ປາກົດຂຶ້ນ, ການຢ້ຽມຢາມຄັ້ງນີ້ ເປັນສັນຍານທີ່ດີຕໍ່ພາກພື້ນອາຊີປາຊີຟິກກໍຄືທົ່ວໂລກ ໂດຍຈີນແລະອົສຕຣລີ, ນູແວນເຊລັງ ຈະສຸມໃສ່ຊຸກຍູ້ການຄ້າແລະການລົງທຶນໃຫ້ເສລີແລະມີຄວາມສະດວກ ທັງປົກປົກຮັກສາສັນຕິພາບ, ສະຖຽນລະພາບ ແລະຄວາມຈະເລີນຮຸ່ງເຮືອງຂອງພາກພື້ນອີກດ້ວຍ.