ໂຄງການສະຫະປະຊາຊາດເພື່ອການພັດທະນາ ຫຼື UNDP ໄດ້ເຜີຍແຜ່ບົດລາຍງານການພັດທະນາມະນຸດ 2016 ຢູ່ນະຄອນຫຼວງສະໂຕໂຄມປະເທດຊູແອັດເມື່ອວັນທີ 21 ມີນານີ້ ໂດຍຊີ້ໃຫ້ເຫັນວ່າ, ໃນວຽກງານບຸລິມະສິດການພັດທະນາທົ່ວໂລກ, ກຸ່ມທີ່ຕົກຢູ່ທ່າອ່ອນທີ່ສຸດໃນໂລກ ຍັງຄົງຖືກເບິ່ງຂ້າມ.
ບົດລາຍງານຊີ້ວ່າ, ອີງຕາມຕົວເລກດັດຊະນີການພັດທະນາມວນມະນຸດ, ລະດັບການພັດທະນາໂດຍສະເລ່ຍໃນພາກພື້ນທົ່ວໂລກ ໄດ້ຮັບຄວາມກ້າວໜ້າຢ່າງພົ້ນເດັ່ນແຕ່ປີ 1990-2015, ແຕ່ຍັງມີປະຊາກອນ 1/3 ດຳລົງຊີວິດຢູ່ລະດັບຕ່ຳ. ຂະນະດຽວກັນ, ປະເທດທີ່ພັດທະນາແລ້ວ ກໍຕ້ອງແກ້ໄຂສິ່ງທ້າທາຍຈາກບັນຫາທຸກຍາກແລະການແຕກໂຕນກັນທາງສັງຄົມ. ທັງນີ້ມີປະຊາກອນຜູ້ທຸກຍາກໂດຍທຽບຖານກວ່າ 300 ລ້ານຄົນດຳລົງຊີວິດຢູ່ປະເທດທີ່ພັດທະນາແລ້ວ, ໃນນັ້ນ ກວ່າ 1/3 ແມ່ນເດັກນ້ອຍ.
ນັບແຕ່ປີ 1990 ເປັນຕົ້ນມາ, ໂຄງການສະຫະປະຊາຊາດເພື່ອການພັດທະນາ ໄດ້ຮຽບຮຽງແລະພິມຈຳໜ່າຍບົດລາຍງານການພັດທະນາມະນຸດທົ່ວໂລກຢ່າງເປັນອິດສະຫຼະ ເພື່ອຮ່ວມມືກັບວົງການຕ່າງໆໃນສັງຄົມ ຊ່ວຍທຸກປະເທດຮັບມືກັບວິກິດການທີ່ເກີດຂຶ້ນ.
 |
