ຕາມຂ່າວສານຊິນຮວາ: ໂດຍຕອບສະໜອງຕາມຄຳເຊີນຂອງທ່ານ ມານໂຄມ ເທີນບູ ນາຍົກລັດຖະມົນຕີອົສຕຣາລີ, ທ່ານ ຫຼີເຄີ້ສຽງ ນາຍົກລັດຖະມົນຕີໄດ້ເດີນທາງເຖິງສະໜາມບິນແຄນແບຣາດ້ວຍເຮືອບິນພິເສດໃນຕອນຄ່ຳວັນທີ 22 ມີນານີ້ ເຊິ່ງເປັນການເລີ່ມຢ້ຽມຢາມປະເທດດັ່ງກ່າວຢ່າງເປັນທາງການ ແລະໃນໄລຍະຢ້ຽມຢາມກໍຈະຈັດການພົບປະລະຫວ່າງນາຍົກສອງປະເທດປະຈຳປີທີ 5.
ໃນໂອກາດຢ້ຽມຢາມ, ທ່ານ ຫຼີເຄີ້ສຽງ ຈະພົບປະກັບທ່ານ ເທີນບູ ຫຼາຍເທື່ອ ແລະເຂົ້າຮ່ວມເປັນສັກຂີພິຍານໃຫ້ແກ່ການເຊັນເອກະສານການຮ່ວມມືສອງຝ່າຍ ແລະຖະແຫຼງຂ່າວ. ຂະນະດຽວກັນ, ນາຍົກລັດຖະມົນຕີສອງປະເທດຍັງຈະເຂົ້າຮ່ວມກອງປະຊຸມເວທີປຶກສາຫາລືຜູ້ນຳແຂວງຂອງຈີນແລະລັດຂອງອົສຕຣາລີຄັ້ງທີ 2 ທີ່ຈັດຂຶ້ນຢູ່ຊິດນີ, ກອງປະຊຸມໂຕະມົນຂອງ CEO ວົງການການຄ້າຈີນ-ອົສຕຣາລີ, ເວທີປຶກສາຫາລືການຮ່ວມມືເສດຖະກິດການຄ້າຈີນ-ອົສຕຣາລີ ແລະກິດຈະກຳວັດທະນະທຳອື່ນໆ. ນອກນີ້, ທ່ານ ຫຼີເຄີ້ສຽງ ຍັງຈະເຂົ້າຢ້ຽມຄຳນັບທ່ານ ປີເຕີ ໂຄສໂກຣຟ ຜູ້ສຳເລັດລາຊະການອົສຕຣາລີ, ພົບປະທ່ານ ສະເຕເຟັນ ພາຣີ ປະທານສະພາສູງ ແລະທ່ານ ໂທນີ ສມິສ ປະທານສະພາຕ່ຳ ລວມທັງທ່ານ ບິວ ໂຊເຕັນ ແລະບຸກຄົນສຳຄັນດ້ານການເມືອງຕື່ມອີກ.
