ໜັງສືພິມສະຕ້າຂອງຟິລິບປິນສະບັບວັນທີ 23 ມີນານີ້ລາຍງານວ່າ, ກ່ອນໜ້ານີ້ບໍ່ດົນ, ທ່ານ ໂລດຣີໂກ ດູເຕີເຕ ປະທານາທິບໍດີປະເທດຕົນ ໄດ້ຢ້ຽມຢາມມຽນມາທາງລັດຖະກິດເປັນເວລາ 3 ວັນ ໂດຍໄດ້ພົບປະກັບທ່ານ ທິນຈໍ ປະທານາທິບໍດີ, ທ່ານນາງ ອອງຊານຊູຈີ ທີ່ປຶກສາແຫ່ງລັດ ແລະທ່ານອື່ນໆ ເພື່ອປຶກສາຫາລືວ່າຈະເພີ່ມທະວີສາຍພົວພັນສອງປະເທດໃນຂົງເຂດຕ່າງໆແນວໃດ.
ທ່ານ ຣາມົນ ໂລເພັສ ລັດຖະມົນຕີກະຊວງການຄ້າແລະອຸດສາຫະກຳຟິລິບປິນກ່າວວ່າ, ສອງຝ່າຍໄດ້ລົງເລິກແລກປ່ຽນຍຸດທະສາດແບບຕ່າງຝ່າຍຕ່າງມີຜົນປະໂຫຍດໃນການເພີ່ມທະວີການຮ່ວມມືດ້ານການຄ້າແລະການລົງທຶນ, ປຶກສາຫາລືການຮ່ວມມືລະຫວ່າງວິສາຫະກິດຂະໜາດກາງແລະນ້ອຍແລະການຊ່ວຍເຫຼືອດ້ານເຕັກນິກກະສິກຳໂດຍສະເພາະ. ຂະນະດຽວກັນ, ສອງປະເທດໄດ້ລົງນາມໃນບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານຄວາມປອດໄພຂອງອາຫານແລະກະສິກຳ ທັງເຫັນດີສົ່ງຜູ້ຊ່ຽວຊານດ້ານກະສິກຳ, ສະໜັບສະໜູນເຕັກນິກ, ເພີ່ມທະວີການຍົກລະດັບການຄຸ້ມຄອງ ແລະມາດຕະການອື່ນໆ ເພື່ອຊຸກຍູ້ການແລກປ່ຽນເຕັກນິກກະສິກຳ.
 |
