ທ່ານໂຣດຣີໂກ ດູເຕີເຕ ປະທານາທິບໍດີຟີລິບປີນກ່າວໃນວັນທີ 24 ມີນານີ້ວ່າ, ການຂະຫຍາຍສາຍພົວພັນເສດຖະກິດການຄ້າກັບຈີນເພື່ອແກ້ໄຂບັນຫາຄວາມທຸກຍາກຂອງປະເທດຕົນແມ່ນທາງເລືອກທີ່ຖືກຕ້ອງ, ຂອບໃຈຈີນທີ່ສະໜັບສະໜູນການພັດທະນາເສດຖະກິດຂອງປະເທດຕົນ.
ທັງນີ້, ໃນໂອກາດເຂົ້າຮ່ວມກອງປະຊຸມຜູ້ຕາງໜ້າສະມາຄົມນັກທຸລະກິດຈີນຟີລິບປີນຢູ່ນະຄອນຫຼວງມະນີລາວັນທີ 24 ມີນານີ້, ທ່ານດູເຕີເຕ ກ່າວວ່າ, ປະເທດໃດໆລ້ວນແຕ່ມີສິດເລືອກໃຊ້ວິທີແກ້ໄຂບັນຫາຂອງປະເທດຕົນເໝາະສົມໂດຍອີງຕາມວັດທະນະທຳແລະສະພາບແວດລ້ອມຂອງຕົນ. "ຟີລິບປີນແມ່ນປະເທດທີ່ທຸກຍາກ, ພວກເຮົາຕ້ອງພັດທະນາເສດຖະກິດ, ສະນັ້ນຂ້າພະເຈົ້າຂໍຄວາມຊ່ວຍເຫຼືອນຳປະເທດຈີນ, ແລະພັດທະນາການພົວພັນເສດຖະກິດການຄ້າກັບຈີນ"
ທ່ານ ດູເຕີເຕ ກ່າວຕື່ມວ່າ, ຕົນຈະເຂົ້າຮ່ວມກອງປະຊຸມເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ທີ່ຈະຈັດຂຶ້ນຢູ່ນະຄອນຫຼວງປັກກິ່ງໃນເດືອນພຶດສະພາປີນີ້. "ໜຶ່ງແລວທາງໜຶ່ງເສັ້ນທາງ" ແມ່ນຂໍ້ລິເລີ່ມທີ່ເຕັມໄປດ້ວຍ "ອຸດົມການອັນກຽງໄກ."
 |
