ວັນທີ 25 ມີນານີ້ ຕາມເວລາທ້ອງຖິ່ນ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ຕ້ອນຮັບການເຂົ້າພົບຂອງທ່ານກຼາດີສ ເບເຣຈິຄຼຽນ ເຈົ້າຄອງລັດນິວຊາວທ໌ເວວສ໌ (New South Wales)ຂອງອົສຕຼາລີຢູ່ນະຄອນຊິດນີ.
ທ່ານຫຼີເຄີ້ສຽງກ່າວວ່າ: ຈີນ-ອົສຕຼາລີສ້າງສາຍພົວພັນທາງການທູດເປັນເວລາ 45 ປີມານີ້, ການພົວພັນລະຫວ່າງສອງປະເທດໄດ້ຮັບການຂະຫຍາຍຕົວຢ່າງຫຼວງຫຼາຍ,ການຮ່ວມມືທີ່ຕິດແທດຕົວຈິງໄດ້ຮັບຜົນສຳເລັດຢ່າງໃຫຍ່ຫຼວງ,ມິດຕະພາບລະຫວ່າງປະຊາຊົນສອງຊາດນັບມື້ນັບແໜ້ນແຟ້ນຂຶ້ນຕື່ມ,ທັງໝົດເຫຼົ່ານີ້ລ້ວນແຕ່ບໍ່ສາມາດແຍກອອກຈາກການສະໜັບສະໜູນຂອງການແລກປ່ຽນແລະຮ່ວມມືລະຫວ່າງທ້ອງຖິ່ນສອງປະເທດ. ໃນໄລຍະທີ່ຂ້າພະເຈົ້າຢ້ຽມຢາມອົສຕຼາລີເທື່ອນີ້,ສອງປະເທດໄດ້ມີຄວາມຮັບຮູ້ທີ່ເປັນເອກະພາບກັນອັນໃໝ່ກ່ຽວກັບການເປີດກວ້າງການໄຂປະຕູໃນຂົງເຂດບໍລິການແລະການລົງທຶນ. ພວກເຮົາສົ່ງເສີມໃຫ້ວິສາຫະກິດຈີນເພີ່ມທະວີການຮ່ວມມືກັບລັດນິວຊາວທ໌ເວວສ໌,ເພີ່ມການແລກປ່ຽນດ້ານເສດຖະກິດການຄ້າ ການລົງທຶນ ວັດທະນະທຳ ການສຶກສາ ການທ່ອງທ່ຽວແລະອື່ນໆ. ການໄຂປະຕູຕໍ່ພາຍນອກຂອງຈີນກໍຈະນັບມື້ນັບຂະຫຍາຍກວ້າງອອກ. ຫວັງໃຫ້ລັດນິວຊາວທ໌ເວວສ໌ອຳນວຍສິ່ງແວດລ້ອມທີ່ດີແລະຄວາມສະດວກໃຫ້ແກ່ວິສາຫະກິດຈີນທີ່ມາລົງທຶນແລະດຳເນີນທຸລະກິດຢູ່ນີ້.
ທ່ານກຼາດີສ ເບເຣຈິຄຼຽນກ່າວວ່າ: ການຢ້ຽມຢາມຂອງທ່ານຫຼີເຄີ້ສຽງໃນຄັ້ງນີ້ໄດ້ຮັບຜົນສຳເລັດຢ່າງຫຼວງຫຼາຍ ເຊິ່ງໄດ້ເອື້ອອຳນວຍໂອກາດໃໝ່ໃຫ້ແກ່ການຂະຫຍາຍການພົວພັນລະຫວ່າງອົສຕຼາລີກັບຈີນແລະລົງເລິກການແລກປ່ຽນແລະຮ່ວມມືລະຫວ່າງລັດນິວຊາວທ໌ເວວສ໌ກັບຈີນ. ລັດນິວຊາວທ໌ເວວສ໌ທະນຸຖະໜອມມິດຕະພາບອົສຕຼາລີ-ຈີນ,ຍິນດີກຳໂອກາດທີ່ຊຸກຍູ້ສັນຍາການຄ້າເສລີລະຫວ່າງສອງປະເທດ,ເສີມຂະຫຍາຍທ່າແຮງຂອງຕົນ,ຂະຫຍາຍການຮ່ວມມືກັບຈີນໃນຂົງເຂດຕ່າງໆເຊັ່ນ ການທະນາຄານ ສາທາລະນະສຸກ ການສຶກສາ ການທ່ອງທ່ຽວແລະອື່ນໆ. ຍິນດີຕ້ອນຮັບວິສາຫະກິດຈີນຫຼາຍກວ່າເກົ່າມາລົງທຶນຢູ່ລັດນິວຊາວທ໌ເວວສ໌.
 |
