ວັນທີ 25 ມີນານີ້, ກອງປະຊຸມສຸດຍອດວິສາມັນສະຫະພາບເອີຣົບເພື່ອລະນຶກການລົງນາມໃນ"ສົນທິສັນຍາໂຣມ"ຄົບຮອບ 60 ປີໄດ້ຈັດຂຶ້ນຢູ່ນະຄອນຫຼວງໂຣມຂອງອີຕາລີ ເຊິ່ງມີຫົວຂໍ້ວ່າ" ເອີຣົບ:ອະນາຄົດຮ່ວມຂອງພວກເຮົາ" ໂດຍມີຜູ້ນຳຈາກ 27 ປະເທດສະມາຊິກຂອງສະຫະພາບເອີຣົບນອກຈາກອັງກິດ ພ້ອມທັງຜູ້ນຳອົງການຕ່າງໆສະຫະພາບເອີຣົບໄດ້ເຂົ້າຮ່ວມ, ຫຼັງກອງປະຊຸມ, ຜູ້ນຳ 27 ປະເທດໄດ້ລົງນາມໃນ"ຖະແຫຼງການໂຣມ".
ທ່ານພາວໂລ ເຈນຕິໂລນີ ນາຍົກລັດຖະມົນຕີອີຕາລີເຊິ່ງເປັນເຈົ້າພາບກອງປະຊຸມສຸດຍອດຄັ້ງນີ້ໄດ້ຫວນຄືນຂະບວນວິວັດການຫັນເອີຣົບເປັນເອກະພົບດຽວ,ແລະກ່າວວ່າ,ເພື່ອສືບຕໍ່ຊຸກຍູ້ພາລະກິດທີ່ຍິ່ງໃຫຍ່ດັ່ງກ່າວ,ປະເທດສະມາຊິກສະຫະພາບເອີຣົບຕ້ອງໃຫ້ຄວາມໝັ້ນໃຈແກ່ປະຊາຊົນຄືນໃໝ່.
ວັນທີ 25 ມີນາປີ 1957, ແບນຊິກ ຝຣັ່ງ ສະຫະພັນເຢຍລະມັນ ອີຕາລີ ໂຮນລັງແລະລຸກຊຳບວກໄດ້ຮ່ວມກັນລົງນາມໃນ"ສົນທິສັນຍາໂຣມ"ຢູ່ໂຣມ ເຊິ່ງໄດ້ເປັນບາດກ້າວສຳຄັນໃນຂະບວນວິວັດຫັນເອີຣົບເປັນເອກະພົບດຽວ ແລະໄດ້ສ້າງພື້ນຖານອັນສຳຄັນໃຫ້ແກ່ການສ້າງສະຫະພາບເອີຣົບຢ່າງເປັນທາງການ.