ຕາມຂ່າວCRI: ວັນທີ 25 ມີນານີ້, ທ່ານຫຼິວເຈີ້ນໝິນ, ລັດຖະມົນຕີຊ່ວຍວ່າການກະຊວງການຕ່າງປະເທດຈີນກ່າວຢູ່ນະຄອນໂປອາວຂອງແຂວງໄຫຫຼຳວ່າ, ບັນດາປະເທດຕາມແຄມທະເລຈີນໃຕ້ຄວນຕັ້ງໜ້າຖອດຖອນບົດຮຽນຢ່າງສໍາເລັດຜົນຂອງພາກພື້ນອື່ນໆ, ລິເລີ່ມແລະສ້າງກົນໄກຮ່ວມມືທີ່ກ່ຽວຂ້ອງ, ໃນເງື່ອນໄຂທີ່ບໍ່ກີດຂວາງການສະເໜີຂອງຝ່າຍຕ່າງໆ, ສ້າງຄວາມໄວ້ເນື້ອເຊື່ອໃຈເພື່ອເພີ່ມທະວີຄວາມສັກສິດ, ພ້ອມທັງຮ່ວມມືແລະຮ່ວມກັນຊົມໃຊ້ຜົນປະໂຫຍດ.
ທ່ານຫຼິວເຈີ້ນໝິນໄດ້ສະແດງຄວາມເຫັນດັ່ງກ່າວໃນເວລາເຂົ້າຮ່ວມພິທີເປີດຂອງເວທີປຶກສາຫາລືສາຂາທະເລຈີນໃຕ້ກອງປະຊຸມປະຈໍາປີ 2017 ຂອງເວທີປຶກສາຫາລືອາຊີໂປອາວ.
ທ່ານຫຼິວເຈີ້ນໝິນໄດ້ປາຖະກະຖາທີ່ມີຈຸດປະສົງຕົ້ນຕໍວ່າ, ກົນໄກຮ່ວມມືທີ່ກ່ຽວຂ້ອງຄວນສອດຄ່ອງກັບກົນໄກຮ່ວມມືສອງຝ່າຍລະຫວ່າງຈີນກັບບັນດາປະເທດອາຊຽນແລະກົນໄກປຶກສາຫາລືຫຼາຍຝ່າຍພາຍໃຕ້ຂອບ "ຄໍາຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້" ລະຫວ່າງຈີນກັບບັນດາປະທະເທດຈີນໃຕ້ທີ່ມີຢູ່ແລ້ວໃນປັດຈຸບັນນີ້, ຈະເປັນການເພີ່ມຕື່ມຂອງຖະແຫຼງການແລະກົນໄກສອງຝ່າຍແລະຫຼາຍຝ່າຍ, ແລະຈະສະໜອງໃໝ່ໃຫ້ແກ່ການດໍາເນີນການຮ່ວມມືດ້ານເຕັກໂນໂລຊີທີ່ກ່ຽວຂ້ອງ. ນອກນີ້, ກົນໄກຮ່ວມມືນີ້ມີຈຸດປະສົງເພື່ອເພີ່ມທະວີການຮ່ວມມືຕົວຈິງ, ເພີ່ມທະວີຄວາມໄວ້ເນື້ອເຊື່ອໃຈ, ບໍ່ກ່ຽວກັບການແກ້ໄຂຄວາມຂັດແຍ່ງ.
ທ່ານຫຼິວເຈີ້ນໝິນກ່າວວ່າ, ບັນດາປະເທດຕາມແຄມທະເລຈີນໃຕ້ດໍາເນີນການຮ່ວມມືບໍ່ມີຜົນກະທົບຕໍ່ປະເທດອະທິປະໄຕທີ່ກ່ຽວຂ້ອງແກ້ໄຂຄວາມຂັດແຍ່ງດ້ານຜືນແຜ່ນດິນແລະສິດຄຸ້ມຄອງໂດຍສັນຕິດ້ວຍການເຈລະຈາປຶກສາຫາລື, ບໍ່ມີຜົນກະທົບຕໍ່ການສະເໜີແລະຫຼັກໝັ້ນກ່ຽວກັບບັນຫາທີ່ກ່ຽວຂ້ອງຂອງປະເທດຕ່າງໆ. ຈີນຍິນດີເພີ່ມທະວີການແລກປ່ຽນແລະການປະສານງານຕື່ມອີກກ່ຽວກັບກົນໄກຮ່ວມມືທີ່ກ່ຽວຂ້ອງກັບຝ່າຍຕ່າງໆ, ຍິນດີກັບບັນດາປະເທດພາກພື້ນໃຫ້ຄວາມເຫັນແລະການສະເໜີຕ່າງໆ.
ທ່ານກ່າວວ່າ, ນັບແຕ່ປີ 2016 ເປັນຕົ້ນມາ, ພາຍໃຕ້ຄວາມພະຍາຍາມຮ່ວມກັນລະຫວ່າງຈີນກັບບັນດາປະເທດອາຊຽນ, ສະຖານະການຂອງທະເລຈີນໃຕ້ໄດ້ຮັກສາຄວາມໝັ້ນທ່ຽງໂດຍພື້ນຖານ, ເລີ່ມມີທ່າອ່ຽງທີ່ມີການພັດທະນາຢ່າງດີ. ການເຮັດໃຫ້ເຂດທະເລຈີນໃຕ້ມີຄວາມສັນຕິພາບສະຖຽນລະພາບແລະການພັດທະນາຢ່າງຈະເລີນຮຸ່ງເຮືອງແມ່ນຄວາມຍິນດີແລະໜ້າທີ່ຮ່ວມກັນຂອງບັນດາປະເທດຕາມແຄມທະເລຈີນໃຕ້, ແມ່ນສອດຄ່ອງກັບຜົນປະໂຫຍດຮ່ວມຂອງບັນດາປະເທດຕາມແຄມທະເລຈີນໃຕ້. ປັດຈຸບັນນີ້, ຄວນຊຸກຍູ້ການຮ່ວມມືລະຫວ່າງບັນດາປະເທດຕາມແຄມທະເລຈີນໃຕ້ເທື່ອລະກ້າວ. ບັນດາປະເທດຕາມແຄມທະເລຈີນໃຕ້ຄວນມີຄວາມກ້າເຂົ້າໃນການປະດິດສ້າງໃໝ່, ບຸກເບີກແນວຄວາມຄິດ, ແກ້ໄຂຄວາມຂັດແຍ່ງຢ່າງເໝາະສົມ, ສຸມໄສການຮ່ວມມື, ສືບຕໍ່ເສີມຂະຫຍາຍມິດຕະພາບຢ່າງເປັນມູນເຊື້ອ, ປົກປັກຮັກສາສັນຕິພາບແລະສະຖຽນລະພາບຂອງທະເລຈີນໃຕ້, ຊຸກຍູ້ການຮ່ວມມື, ການພັດທະນາແລະຄວາມຈະເລີນຮຸ່ງເຮືອງຂອງພາກພື້ນນີ້.
ຊ່ຽວຊານ, ນັກວິທະຍາສາດພາຍໃນແລະຕ່າງປະເທດທີ່ໄດ້ເຂົ້າຮ່ວມກອງປະຊຸມເຫັນດີໂດຍທົ່ວໄປນໍາການວິນິດໄສຕໍ່ສະຖານະການຂອງທະເລຈີນໃຕ້ໃນປັດຈຸບັນນີ້, ໄດ້ດໍາເນີນການປຶກສາຫາລືຢ່າງຕັ້ງໜ້າກ່ຽວກັບການລິເລີ່ມແລະສ້າງກົນໄກຮ່ວມມືລະຫວ່າງບັນດາປະເທດຕາມແຄມທະເລຈີນໃຕ້ທີ່ສະເໜີໂດຍທ່ານຫຼິວເຈີ້ນໝິນ, ເຫັນວ່າລະຫວ່າງບັນດາປະເທດຕາມແຄມທະເລຈີນໃຕ້ມີມິດຕະພາບອັນມີມູນເຊື້ອຕະຫຼອດມາ, ປະເທດຕ່າງໆຄວນຈິດໜຶ່ງໃຈດຽວພະຍາຍາມຮ່ວມກັນເພື່ອຊຸກຍູ້ການຮ່ວມມືຕົວຈິງກ່ຽວກັບວຽກງານເທິງທະເລ, ເພື່ອລົງເລິກຄວາມໄວ້ເນື້ອເຊື່ອໃຈລະຫວ່າງບັນດາປະເທດ, ແລະສ້າງບັນຍາກາດຢ່າງດີເພື່ອການແກ້ໄຂຄວາມຂັດແຍ່ງທີ່ກ່ຽວຂ້ອງໃນສຸດທ້າຍດ້ວຍການເຈລະຈາແລະປຶກສາຫາລືລະຫວ່າງປະເທດທີ່ກ່ຽວຂ້ອງໂດຍກົງ.