ເຫດດັ່ງກ່າວເກີດຂຶ້ນຢູ່ໂຮງລາຕີບັນເທີງແຫ່ງໜຶ່ງຢູ່ເມືອງຊິນຊິນນາຕີ ລັດໂອໄຮໂອ ສະຫະລັດອາເມລິກາ ໃນຕອນຮຸ່ງເຊົ້າວັນທີ 26 ມີນານີ້ ສົ່ງຜົນເຮັດໃຫ້ຢ່າງໜ້ອຍ 1 ຄົນເສຍຊີວິດ, 14 ຄົນໄດ້ຮັບບາດເຈັບ ແລະມາຮອດປັດຈຸບັນ, ມືປືນຢ່າງໜ້ອຍໜຶ່ງຄົນໄດ້ປົບໜີ, ຂະນະທີ່ເຈົ້າໜ້າທີ່ຕຳຫຼວດພວມສືບສວນວ່າມີຜູ້ກໍ່ເຫດອື່ນອີກຫຼືບໍ່.
ທ່ານປາວ ນິວດີກັດ ຮອງຫົວໜ້າສະຖານີຕຳຫຼວດເມືອງຊິນຊິນນາຕີ ກ່າວວ່າ: ປັດຈຸບັນສາມາດຢືນຢັນໄດ້ວ່າມີມືປືນພຽງແຕ່ 1 ຄົນເທົ່ານັ້ນ. ຂະນະດຽວກັນກໍຍັງບໍ່ທັນຈັບຜູ້ຕ້ອງສົງໄສໄດ້ຈັກຄົນເທື່ອ ແລະພວມສືບສວນ-ສອບສວນ ລວມທັງໄດ້ຖາມຜູ້ເຫັນເຫດການ. ຂະນະທີ່ປັດຈຸບັນບໍ່ມີສັນຍານສະແດງໃຫ້ເຫັນວ່າເຫດການດັ່ງກ່າວມີສ່ວນກ່ຽວຂ້ອງກັບລັດທິກໍ່ການຮ້າຍ ແລະກໍບໍ່ຮູ້ເຈຕະນາຂອງຜູ້ກໍ່ເຫດ, ແຕ່ເຈົ້າໜ້າທີ່ຕຳຫຼວດກໍຖືເປັນຄະດີອາຍາ.
ຜູ້ເຫັນເຫດການຄົນໜຶ່ງໄດ້ກ່າວຕໍ່ນັກຂ່າວໂທລະພາບທ້ອງຖິ່ນວ່າ: ກ່ອນຈະເກີດເຫດປະມານ 10 ນາທີ, ຕົນໄດ້ຍິນຜູ້ດຳເນີນລາຍການຂອງໂຮງບັນເທີງເຕືອນລູກຄ້າເພື່ອຄວາມປອດໄພ.