ທ່ານຊູບຣາມານຽມ ລັດຖະມົນຕີກະຊວງສາທາລະນະສຸກມາເລເຊຍ ຢືນຢັນໃນວັນທີ 26 ມີນານີ້ວ່າ: ລັດຖະບານປະເທດຕົນຈະຕົກລົງແກ້ໄຂບັນຫາສົບທ່ານກິມຈົງນາມ ຊາຍ ສປປ ເກົາຫຼີ ໃນໄວໆນີ້, ຂະນະທີ່ປັດຈຸບັນຝ່າຍຕ່າງໆພວມປຶກສາກັນ ລວມທັງການປຶກສາກັນລະຫວ່າງກະຊວງການຕ່າງປະເທດແລະສຳນັກງານນາຍົກລັດຖະມົນຕີປະເທດຕົນ ພ້ອມທັງປຶກສາກັບລັດຖະບານ ສປປ ເກົາຫຼີອີກດ້ວຍ. ປັດຈຸບັນເຫັນວ່າໄດ້ມີການຕົກລົງສ່ວນໜຶ່ງແລ້ວ ແລະຈະປະກາດຕໍ່ພາຍນອກໃນໄວໆນີ້, ຂະນະທີ່ກະຊວງສາທາລະນະສຸກກໍຈະແກ້ໄຂບັນຫາສົບຂອງຜູ້ກ່ຽວຕາມການຕົກລົງຂອງລັດຖະບານປະເທດຕົນ.
ທັງນີ້ ເມື່ອວັນທີ 13 ກຸມພາຜ່ານມາ, ຊາຍ ສປປ ເກົາຫຼີ ຄົນໜຶ່ງໄດ້ເສຍຊີວິດຢູ່ສະໜາມບິນສາກົນນະຄອນຫຼວງກົວລາລຳເປີ ແລະຈາກນັ້ນມາ, ລັດຖະບານມາເລເຊຍ ແລະ ລັດຖະບານ ສປປ ເກົາຫຼີ ໄດ້ເກີດຄວາມຂັດແຍ້ງກັນໃນການແກ້ໄຂບັນຫາສົບຂອງຜູ້ກ່ຽວ ສົ່ງຜົນເຮັດໃຫ້ການພົວພັນລະຫວ່າງສອງປະເທດເຄັ່ງຕຶງຂຶ້ນໃນຊົ່ວໄລຍະໜຶ່ງ.