ວັນທີ 26 ມີນານີ້, ກອງປະຊຸມປະຈຳປີຂອງເວທີປຶກສາຫາລືອາຊີໂປອາວ 2017 ໄດ້ອອກຖະແຫຼງການກ່ຽວກັບການຊຸກຍູ້ເສດຖະກິດແບບໂລກາພິວັດ ໂດຍຮຽກຮ້ອງໃຫ້ລັດຖະບານປະເທດຕ່າງໆແລະວົງການວິສາຫະກິດໃນໂລກ ຍຶດໝັ້ນຊຸກຍູ້ການໄຂປະຕູຕະຫຼາດ,ການເຕີບໂຕແບບກວມລວມແລະການຮ່ວມມືດ້ານເສດຖະກິດ ເພື່ອຮັບປະກັນຄວາມຈະເລີນຮຸ່ງເຮືອງຮ່ວມກັນແລະການເຕີບໂຕແບບຍືນຍົງຂອງເສດຖະກິດໂລກ.
ຖະແຫຼງການຊີ້ໃຫ້ເຫັນວ່າ, ເສດຖະກິດໂລກາພິວັດມີຜົນມາຈາກຄວາມກ້າວໜ້າຂອງວິທະຍາສາດເຕັກໂນໂລຊີ,ການໃຊ້ມາດຕະການສວນທາງກັບໂລກາພິວັດ ບໍ່ສາມາດແກ້ໄຂບັນຫາໃໝ່ທີ່ເກີດຂຶ້ນຍ້ອນເສດຖະກິດໂລກາພິວັດແລະທີ່ແຮງກວ່ານັ້ນອີກກໍຄືຈະເປັນສິ່ງທ້າທາຍໃໝ່ຕໍ່ການເຕີບໂຕຂອງເສດຖະກິດໂລກ. ຈາກນີ້ທົ່ວໂລກຈຶ່ງຄວນເດີນຕາມເສດຖະກິດໂລກາພິວັດຢ່າງເປັນເຈົ້າຕົນເອງ,ປະຕິຮູບລະບົບການຄຸ້ມຄອງຂອງໂລກ.
ຖະແຫຼງການລະບຸຕື່ມວ່າ: ເວທີປຶກສາຫາລືອາຊີໂປອາວແລະບັນດາຜູ້ຕາງໜ້າປະເທດຕ່າງໆລ້ວນແຕ່ຍິນດີເພີ່ມທະວີການຕິດຕໍ່ພົວພັນ,ການປະສານງານແລະການຮ່ວມມືໃນຫຼາຍດ້ານ ເພື່ອຊຸກຍູ້ເສດຖະກິດໂລກາພິວັດພັດທະນາໄປຕາມທິດເປີດປະຕູ,ກວມລວມ,ຕ່າງຝ່າຍຕ່າງມີຜົນປະໂຫຍດແລະດຸ່ນດ່ຽງກັນ ພ້ອມທັງເສີມຂະຫຍາຍບົດບາດທີ່ພິເສດຂອງຕົນ.
 |
