ຕາມຂ່າວສານຈີນ: ເຈົ້າໜ້າທີ່ທະຫານອາເມລິກາໄດ້ຮັບສາລະພາບໃນວັນທີ 25 ມີນານີ້ວ່າ, ກອງທະຫານຫຼາຍປະເທດທີ່ນຳໂດຍອາເມລິກາໄດ້ໂຈມຕີເຂດໂມຊູນປະເທດອີຣັກທາງອາກາດໃນວັນທີ 17 ມີນານີ້. ຂະນະທີ່ເຈົ້າໜ້າທີ່ແລະປະຊາຊົນອີຣັກກໍໄດ້ບອກກ່ອນໜ້ານີ້ວ່າ, ການໂຈມຕີດັ່ງກ່າວໄດ້ເຮັດໃຫ້ຫຼາຍກວ່າ 200 ຄົນເສຍຊີວິດ ໂດຍໃນນັ້ນສ່ວນຫຼາຍແມ່ນປະຊາຊົນ. ແນວໃດກໍດີ ເຈົ້າໜ້າທີ່ທະຫານອາເມລິກາກໍພວມກວດກາເລື່ອງນີ້.
ສື່ມວນຊົນອາເມລິກາໄດ້ເປີດເຜີຍຂໍ້ມູນຈາກການບອກຂອງເຈົ້າໜ້າທີ່ອີຣັກວ່າ, ສາມາດກອບກູ້ຊາກສົບ 83 ຄົນອອກຈາກຊາກອາຄານໄດ້ແລ້ວ ເຊິ່ງມີທັງແມ່ຍິງ ແລະເດັກນ້ອຍ ແລະການກອບກູ້ຍັງພວມດຳເນີນການຢ່າງຂຸ້ນຂ້ຽວ. ແນວໃດກໍດີ ຂ່າວສານລອຍເຕີຂອງອັງກິດໄດ້ລາຍງານວ່າ, ສາມາດກອບກູ້ສົບຈາກຊາກອາຄານໄດ້ແລ້ວກວ່າ 200 ຄົນ.
ພາຍຫຼັງເຈົ້າໜ້າທີ່ທະຫານອາເມລິກາຮັບສາລະພາບການໂຈມຕີເທື່ອນີ້ແລ້ວ, ເຈົ້າໜ້າທີ່ທະຫານອີຣັກກໍໄດ້ແຈ້ງໃນວັນທີ 25 ມີນານີ້ວ່າ, ຈາກການທີ່ປະຊາຊົນເສຍຊີວິດຢ່າງຫຼວງຫຼາຍ, ຈິ່ງໄດ້ຢຸດເຄື່ອນໄຫວທາງການທະຫານຢູ່ເຂດໂມຊູນ.