ຕອນເຊົ້າວັນທີ 27 ມີນານີ້ ຕາມເວລາທ້ອງຖິ່ນ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ພົບປະກັບທ່ານບິວອິງກລິສ ນາຍົກລັດຖະມົນຕີນູແວນເຊລັງຢູ່ນະຄອນຫຼວງເວວລິງຕັນປະເທດດັ່ງກ່າວ.
ສອງຝ່າຍເປັນເອກະພາບກັນເຫັນດີເສີມຂະຫຍາຍສາຍພົວພັນລະຫວ່າງສອງປະເທດ, ລົງເລິກການຮ່ວມມືໃນການສ້າງ "ໜຶ່ງແລວທາງໜຶ່ງເສັ້ນທາງ", ຮ່ວມມືຄົ້ນຄວ້າແລະຮ່ວມກັນຊົມໃຊ້ຂໍ້ມູນຂ່າວສານໃຫ້ຫຼາຍຂຶ້ນ ທັງເປີດກວ້າງການຮ່ວມມືດ້ານທຸລະກິດເອເລັກໂຕຣນິກຂ້າມຊາດ. ເພີ່ມທະວີການເປີດປະຕູ ການຄ້າແລະການລົງທຶນຕື່ມອີກ ແລະຍົກລະດັບການຮ່ວມມືດ້ານເສດຖະກິດການຄ້າໃຫ້ສູງຂຶ້ນ, ທັງຊຸກຍູ້ຂະບວນການໂລກາວິວັດທາງເສດຖະກິດຢ່າງເດັດດ່ຽວໜຽວແໜ້ນ, ເລັ່ງລັດຊຸກຍູ້ການເຈລະຈາສັນຍາຄູ່ຮ່ວມມືເສດຖະກິດຮອບດ້ານໃນພາກພື້ນຫຼືRCEP, ເສີມຂະຫຍາຍບົດບາດທີ່ດີເພື່ອຊຸກຍູ້ການເຕີບໂຕຂອງເສດຖະກິດໂລກ,ສ້າງສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງໃນພາກພື້ນ.
ຂະນະດຽວກັນ,ສອງຝ່າຍຍັງໄດ້ລົງເລິກແລກປ່ຽນຄວາມເຫັນກ່ຽວກັບບັນຫາສາກົນແລະພາກພື້ນທີ່ສົນໃຈຮ່ວມກັນ.
ຫຼັງການພົບປະເຈລະຈາ, ນາຍົກທັງສອງປະເທດຍັງໄດ້ຮ່ວມກັນເປັນສັກຂີພິຍານການລົງນາມໃນສັນຍາຮ່ວມມືຫຼາຍສະບັບໃນຂົງເຂດຕ່າງໆເປັນຕົ້ນ ເສດຖະກິດການຄ້າ,ວັດທະນະທຳ,ການສຶກສາ, ວິທະຍາສາດເຕັກໂນໂລຊີ,ດ່ານພາສີ,ການທ່ອງທ່ຽວແລະອື່ນໆ.