ຕາມຂ່າວສານຈີນ: ຖ້ຽວບິນຍົນເໝົາລຳຈາກເມືອງໄຫໂຂແຂວງໄຫຫຼຳຈີນສູ່ຊຽງໃໝ່ປະເທດໄທທີ່ບໍລິສັດສາຍການບິນຫຼຽນເຫີໄຫຫຼຳແລະບໍລິສັດສາຍການບິນນະຄອນຫຼວງຮ່ວມດຳເນີນທຸລະກິດນັ້ນ ໄດ້ເປີດນຳໃຊ້ຢ່າງເປັນທາງການໃນຕອນເຊົ້າວັນທີ 27 ມີນານີ້, ຂະນະທີ່ວັນທີ 31 ເດືອນດຽວກັນຈະເປີດຖ້ຽວບິນຊຽງລາຍ ແລະນີ້ເປັນເທື່ອທຳອິດທີ່ແຂວງດັ່ງກ່າວເປີດຖ້ຽວບິນສູ່ພາກເໜືອປະເທດໄທ.
ຂ່າວແຈ້ງຕື່ມວ່າ, ຖ້ຽວບິນແຕ່ໄຫໂຂຫາຊຽງໃໝ່ຈະບໍລິການອາທິດລະຖ້ຽວ ໂດຍຈະເລີ່ມອອກຈາກເມືອງໄຫໂຂໃນຕອນເຊົ້າ 7 ໂມງ 45 ນາທີທຸກວັນຈັນຕາມເວລາປັກກິ່ງ ແລະເດີນທາງເຖິງຊຽງໃໝ່ໃນເວລາ 9 ໂມງ 50 ນາທີຕາມເວລາຊຽງໃໝ່; ສ່ວນຂ້າກັບອອກຈາກຊຽງໃໝ່ 11 ໂມງ 25 ນາທີເຖິງເມືອງໄຫໂຂໃນເວລາ 14 ໂມງ 55 ນາທີຕາມເວລາປັກກິ່ງ. ເຈົ້າໜ້າທີ່ບໍລິສັດການບິນຫຼຽນຫີໄຫຫຼຳຈີນກ່າວວ່າ, ການເປີດສອງຖ້ຽວບິນດັ່ງກ່າວຈະອຳນວຍຄວາມສະດວກໃຫ້ແກ່ນັກທ່ອງທ່ຽວແຂວງໄຫຫຼຳ ທັງກໍຈະຊຸກຍູ້ການໄປມາຫາສູ່ແລະການຮ່ວມມືດ້ານການທ່ອງທ່ຽວ ກໍຄືເສດຖະກິດການຄ້າລະຫວ່າງແຂວງໄຫຫຼຳກັບປະເທດໄທ.