ທ່ານນາງຮວາຊຸນຢິງ ໂຄສົກກະຊວງການຕ່າງປະເທດຈີນໄດ້ຢືນຢັນໃນການຖະແຫຼງຂ່າວ ປົກກະຕິໃນວັນທີ 28 ມີນານີ້ວ່າ: ໄດ້ເຊີນຜູ້ຊີ້ນຳທີ່ກ່ຽວຂ້ອງຂອງກະຊວງການຕ່າງປະເທດຟີລິບປິນມາຈີນໃນເດືອນພຶດສະພາປີນີ້ເພື່ອຮ່ວມກັນຈັດກອງປະຊຸມກົນໄກສອງຝ່າຍຫາລືບັນຫາທະເລຈີນໃຕ້ຄັ້ງທຳອິດ.
ທ່ານນາງຮວາຊຸນຢິງກ່າວວ່າ, ດ້ວຍຄວາມເປັນເອກະພາບທີ່ສຳຄັນຂອງຜູ້ນຳຈີນ-ຟີລິບປິນທີ່ໄດ້ຕົກລົງຮ່ວມກັນນັ້ນ, ການຫາລືທາງການທູດຈີນ-ຟີລິບປິນເທື່ອທີ 20 ທີ່ຈັດຂຶ້ນໃນເດືອນມັງກອນປີນີ້, ກໍໄດ້ເຫັນດີສ້າງຕັ້ງກົນໄກຫາລືບັນຫາທະເລຈີນໃຕ້ລະຫວ່າງຈີນ-ຟີລິບປິນໂດຍໃຫ້ກະຊວງການຕ່າງປະເທດຂອງສອງປະເທດຊີ້ນຳການຫາລືບັນຫາທີ່ສອງຝ່າຍສົນໃຈຮ່ວມກັນພ້ອມດ້ວຍ ສົ່ງເສີມການຮ່ວມມືທາງທະເລແລະຄວາມໝັ້ນຄົງທາງທະເລ.
ທ່ານນາງຮວາຊຸນຢິງກ່າວຕື່ມວ່າ ບາດກ້າວຕໍ່ໄປ,ຈີນຍິນດີສືບຕໍ່ເພີ່ມທະວີການແລກປ່ຽນແລະສົນທະນາກັບຟີລິບປິນ, ເພື່ອຄວບຄຸມຄວາມເຫັນຂັດແຍ້ງກັນໃຫ້ເໝາະສົມ, ຊຸກຍູ້ການຮ່ວມມືທາງທະເລ, ສ້າງບັນຍາກາດໃຫ້ແກ່ການຮ່ວມມືຕົວຈິງລະຫວ່າງສອງຝ່າຍໃນບັນດາຂົງເຂດໃຫ້ດີແລະເຮັດໃຫ້ສາຍພົວພັນຈີນ-ຟີລິບປິນຂະຫຍາຍຕົວຢ່າງປອດໃສແລະໝັ້ນທ່ຽງ.