ລັດຖະບານອິນໂດເນເຊຍໄດ້ຍື່ນໜັງສືຕໍ່ອົງການການຄ້າໂລກຢ່າງເປັນທາງການໃນວັນທີ 27 ມີນານີ້ ເພື່ອປະທ້ວງສະຫະພາບເອີຣົບ ແລະ ອາເມລິກາເກັບພາສີຕ້ານການຂາຍເທຕະຫຼາດເຊື້ອໄຟຊີວະພາບຂອງປະເທດຕົນ.
ຂ່າວແຈ້ງວ່າ, ນັບແຕ່ສະຫະພາບເອີຣົບໄດ້ຍົກອັດຕາພາສີຕ້ານການຂາຍເທຕະຫຼາດຕໍ່ອິນໂດເນເຊຍຈາກ 8,8% ຂຶ້ນເປັນ 23,3% ເມື່ອປີ 2013 ເປັນຕົ້ນມາ, ປະເທດດັ່ງກ່າວຕ້ອງໄດ້ຈ່າຍເພີ່ມເພື່ອການສົ່ງອອກນ້ຳມັນປາມ 102 ເອີໂຣຕໍ່ໂຕນ, ຂະນະທີ່ອາເມລິກາກໍປະຕິບັດຕາມສະຫະພາບເອີຣົບ ໂດຍໄດ້ຍົກອັດຕາພາສີຈາກ 8,8% ຂຶ້ນເປັນ 20,5%. ຈາກການເພີ່ມອັດຕາພາສີທີ່ສູງຂຶ້ນ ຍອດມູນຄ່າຜະລິດຕະພັນທີ່ກ່ຽວຂ້ອງຂອງອິນໂດເນເຊຍທີ່ສົ່ງອອກໄປ ເອີຣົບ ໄດ້ຫຼຸດຈາກ 635 ລ້ານໂດລາສະຫະລັດເມື່ອປີ 2013 ລົງເປັນ 9 ລ້ານໂດລາສະຫະລັດເມື່ອປີ 2016.
