ຕາມຂ່າວCRI: ສະຖານທູດຈີນປະຈຳຝຣັ່ງແຈ້ງໃນວັນທີ 28 ມີນານີ້ວ່າ, ກະຊວງການຕ່າງປະເທດຈີນ ແລະສະຖານທູດຈີນປະຈຳຝຣັ່ງໄດ້ເອົາໃຈໃສ່ສູງຕໍ່ເຫດການທີ່ພົນລະເມືອງຈີນຢູ່ຝຣັ່ງໄດ້ປະທະກັບຕຳຫຼວດປະເທດດັ່ງກ່າວ ແລະຖືກຍິງເສຍຊີວິດ ໃນວັນທີ 26 ມີນານີ້ ແລະໄດ້ສອບຖາມເຈົ້າໜ້າທີ່ຝຣັ່ງຢ່າງທັນການ ທັງຕໍ່ວ່າທັກທ້ວງ ແລະທວງໃຫ້ຝ່າຍທີ່ກ່ຽວຂ້ອງຂອງຝຣັ່ງໃຊ້ມາດຕະການທີ່ເປັນຮູບປະທຳ ເພື່ອປ້ອງກັນຄວາມປອດໄພ, ສິດ ແລະຜົນປະໂຫຍດທີ່ຊອບດ້ວຍກົດໝາຍຂອງພົນລະເມືອງຈີນຢູ່ຝຣັ່ງ.
ວັບໄຊທາງການຂອງສະຖານທູດຈີນປະຈຳຝຣັ່ງໄດ້ຖະແຫຼງໃນມື້ດຽວກັນວ່າ, ສະຖານທູດຈີນປະຈຳຝຣັ່ງໄດ້ສະແດງຄວາມຕໍ່ວ່າຢ່າງເຄັ່ງຂຶມຕໍ່ທີ່ປຶກສາວຽກງານພົວພັນຕ່າງປະເທດຂອງລັດຖະມົນຕີກະຊວງພາຍໃນຝຣັ່ງອີກເທື່ອໜຶ່ງ ແລະທວງໃຫ້ເຈົ້າໜ້າທີ່ຝຣັ່ງສືບຫາດຄວາມຈິງຂອງເຫດການໂດຍໄວ ແລະມີຄຳອະທິບາຍຢ່າງຍຸຕິທຳແລະສົມເຫດສົມຜົນຕໍ່ເຫດການດັ່ງກ່າວ.
ເຈົ້າໜ້າທີ່ສະຖານທູດຈີນປະຈຳຝຣັ່ງກ່າວວ່າ, ກະຊວງການຕ່າງປະເທດຈີນແລະສະຖານທູດຈີນປະຈຳຝຣັ່ງຈະຕິດຕາມຄວາມຄືບໜ້າຂອງເຫດການຢ່າງໃກ້ຊິດ ທັງແລກປ່ຽນຂໍ້ມູນກັບຄອບຄົວຜູ້ເສຍຊີວິດແລະວົງການຊາວຈີນທີ່ອາໄສຢູ່ຝຣັ່ງ ແລະຈະຊ່ວຍເຫຼືອຕື່ມອີກ.