ແຫຼ່ງຂ່າວຈາກເວັບໄຊຟິລິບປິນເດລີອິນກວີເຣີ ເປີດເຜີຍໃນວັນທີ 25 ມີນານີ້ວ່າ ທ່ານໂຣດຣີໂກ ດູເຕີເຕ ປະທານາທິບໍດີປະເທດຕົນໄດ້ກ່າວຂະນະໂອ້ລົມນັກທຸລະກິດຟິລິບປິນແລະຈີນໃນວັນທີ 24 ມີນານີ້ວ່າ: ຕົນຈະເດີນທາງໄປຈີນເພື່ອເຂົ້າຮ່ວມກອງປະຊຸມເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ແລະຊົມເຊີຍຈີນອີກເທື່ອໜຶ່ງທີ່ຊ່ວຍແກ້ໄຂບັນຫາເສດຖະກິດຂອງປະເທດຕົນ.
ທ່ານດູເຕີເຕ ກ່າວວ່າ: ຂ້າພະເຈົ້າຕ້ອງຂອບໃຈຈີນອີກເທື່ອໜຶ່ງ ແລະ ຈະເດີນທາງໄປຈີນ, ຂະນະທີ່ຈີນກໍໄດ້ເຊີນຂ້າພະເຈົ້າເຂົ້າຮ່ວມກອງປະຊຸມເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ແລະນີ້ກໍແມ່ນໂຄງການທີ່ມີອຸດົມການສູງຂອງຈີນ. ນອກນີ້, ທ່ານດູເຕີເຕ ຍັງໄດ້ກ່າວຢືນຢັນວ່າ ນະໂຍບາຍການຕ່າງປະເທດຂອງຕົນຈະ ແຕກຕ່າງກັບລັດຖະບານຊຸດກ່ອນ ໂດຍຫວັງຈະຮັດແໜ້ນສາຍພົວພັນດ້ານເສດຖະກິດກັບຈີນເປັນສຳຄັນ.