ໃນການຖະແຫຼງຂ່າວທີ່ຈັດຂຶ້ນໃນວັນທີ 30 ມີນານີ້, ທ່ານ ລູ້ຄ່າງ ໂຄສົກກະຊວງການຕ່າງປະເທດຈີນກ່າວວ່າ: ທາງລົດໄຟຄວາມໄວສູງຈາກາຕາ-ບັນດຸງແມ່ນໂຄງການທີ່ເປັນຂີດໝາຍຂອງການຮ່ວມມືລະຫວ່າງຈີນ-ອິນໂດເນເຊຍຢ່າງແທ້ຈິງແລະຮອບດ້ານ ໂດຍສອງຝ່າຍໄດ້ເນັ້ນນະໂຍບາຍແບບຕ່າງຝ່າຍຕ່າງມີຜົນປະໂຫຍດ, ແລະຈາກນີ້ຈີນຈຶ່ງໝັ້ນໃຈຢ່າງເຕັມສ່ວນວ່າທາງລົດໄຟຄວາມໄວສູງຈາກາຕາ-ບັນດຸງຈະສ້າງສຳເລັດແລະເລີ່ມບໍລິການຕາມຄາດໝາຍທີ່ວາງໄວ້.
ທ່ານ ລູ້ຄ່າງ ກ່າວຕື່ມວ່າ: ທາງລົດໄຟຈາກາຕາ-ບັນດຸງແມ່ນທາງລົດໄຟຄວາມໄວສູງສັງລວມແລະເປັນໂຄງການທຳອິດທີ່ໄດ້ນຳໃຊ້ເຕັກໂນໂລຊີ,ມາດຖານແລະອຸປະກອນຂອງຈີນທີ່ສ້າງຢູ່ຕ່າງປະເທດ,ທັງແມ່ນຜົນສຳເລັດ ເບື້ອງຕົ້ນໃນການສ້າງ "ໜຶ່ງແລວທາງໜຶ່ງເສັ້ນທາງ". ຫຼັງຈາກສ້າງສຳເລັດແລ້ວ, ຈະກາຍເປັນທາງລົດໄຟຄວາມໄວສູງສາຍທຳອິດຂອງອິນໂດເນເຊຍກໍຄືຂອງອາຊີຕາເວັນອອກສຽງໃຕ້.
ທ່ານ ລູ້ຄ່າງ ກ່າວຕື່ມວ່າ: ຈາກຄວາມພະຍາຍາມຮ່ວມລະຫວ່າງລັດຖະບານແລະວິສາຫະກິດທີ່ກ່ຽວຂ້ອງຂອງສອງປະເທດ, ການກະກຽມໃຫ້ແກ່ການເລີ່ມລົງມືສ້າງທາງລົດໄຟພວມດຳເນີນຕາມແຜນ. ປັດຈຸບັນ,ສອງຝ່າຍພວມປຶກສາຫາລືກ່ຽວກັບສັນຍາຮັບເໝົາໂຄງການແລະສັນຍາວ່າດ້ວຍເງິນກູ້ ໂດຍຄາດວ່າຈະໄດ້ຮັບການລົງນາມໃນໄວໆນີ້.
 |
