ຕາມຂ່າວສານຈີນ: ທ່ານຂົງສວນໂຢ້ ຜູ້ຊ່ວຍລັດຖະມົນຕີກະຊວງການຕ່າງປະເທດຈີນກ່າວໃນກອງປະຊຸມສຳມະນາໂອກາດສະຫຼອງວັນຄົບຮອບ 50 ປີແຫ່ງການສ້າງຕັ້ງອາຊຽນທີ່ຈັດຂຶ້ນໃນວັນທີ 30 ມີນານີ້ວ່າ, ຈີນແລະອາຊຽນຄວນເພີ່ມທະວີການຮ່ວມມືກັນ, ຂະຫຍາຍການເປັນເພື່ອນມິດກັນໃຫ້ກວ້າງອອກ ແລະສ້າງອະນຸພາກພື້ນໃຫ້ຈະເລີນກວ່າເກົ່າ.
ກອງປະຊຸມສຳມະນາດັ່ງກ່າວໂດຍສູນຈີນ-ອາຊຽນ ແລະສະຖາບັນຄົ້ນຄວ້າບັນຫາສາກົນຈີນຮ່ວມກັນຈັດຂຶ້ນນັ້ນ ໄດ້ເນັ້ນໃສ່ປຶກສາຫາລືໃນຫົວຂໍ້ "ຈຸດເລີ່ມໃໝ່ ແລະໂອກາດໃໝ່". ຂະນະທີ່ທ່ານຂົງສວນໂຢ້ກໍເຫັນວ່າຫົວຂໍ້ນີ້ແທດເໝາະກັບທີ່ຕັ້ງປະຫວັດສາດແຫ່ງການພົວພັນລະຫວ່າງຈີນແລະອາຊຽນໃນປັດຈຸບັນ.
ທ່ານຂົງສວນໂຢ້ກ່າວຕື່ມວ່າ, ບັນດາປະເທດອາຊຽນເປັນເປົ້າໝາຍແລະຄູ່ຮ່ວມມືທີ່ສຳຄັນສຳລັບຈີນໃນການຊຸກຍູ້ສ້າງ "ໜຶ່ງແລວທາງ, ໜຶ່ງເສັ້ນທາງ" ເຊິ່ງສອງຝ່າຍຄວນກຳໂອກາດນີ້ ທັງເພີ່ມທະວີການເຊື່ອມໂຍງໃນການວາງແຜນພັດທະນາ, ລົງເລິກການຮ່ວມມືການເຊື່ອມຈອດກັນ ແລະການຮ່ວມມືດ້ານຄວາມສາມາດການຜະລິດ, ເປີດກວ້າງການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ. ຂະນະດຽວກັນ, ຊຸກຍູ້ການຮ່ວມມືທີ່ຕິດແທດຕົວຈິງໃນຂົງເຂດການຄ້າ, ການລົງທຶນ, ການສຶກສາ, ວັດທະນະທຳ ແລະການທ່ອງທ່ຽວລະຫວ່າງຈີນແລະອາຊຽນ.