ເຈົ້າໜ້າທີ່ກົມສະຖິຕິຫວຽດນາມເປີດເຜີຍໃນວັນທີ 29 ມີນາຜ່ານມາວ່າ, ຍອດມູນຄ່າການຄ້າສອງຝ່າຍຈີນ-ຫວຽດນາມໃນໄຕມາດທີໜຶ່ງຂອງປີນີ້ບັນລຸ 17 ຕື້ 900 ລ້ານໂດລາສະຫະລັດ. ຂະນະທີ່ໃນໄລຍະດັ່ງກ່າວ, ຫວຽດນາມໄດ້ສົ່ງອອກສິນຄ້າມາຈີນບັນລຸມູນຄ່າເຖິງ 6 ຕື້ໂດລາສະຫະລັດ ເພີ່ມຂຶ້ນຫຼາຍກວ່າໄລຍະດຽວກັນຂອງປີຜ່ານມາ 43,3% ເຊິ່ງຮອງຈາກອາເມລິກາແລະສະຫະພາບເອີລົບ ແລະມາຮອດວັນທີ 20 ມີນາຜ່ານມາ, ວິສາຫະກິດຈີນເຂົ້າມາລົງທຶນຕາມສັນຍາມີມູນຄ່າເຖິງ 684 ລ້ານໂດລາສະຫະລັດ ເຊິ່ງເປັນອັນດັບສອງຈາກ 38 ປະເທດແລະເຂດແຄວ້ນທີ່ມາລົງທຶນ ແລະກວມ 23,4% ຂອງຍອດມູນຄ່າການລົງທຶນຂອງຕ່າງປະເທດຢູ່ປະເທດຂອງຕົນ.
ຂ່າວແຈ້ງວ່າ, ດ້ານການທ່ອງທ່ຽວກໍມີພົນລະເມືອງຈີນເກືອບສາມແສນເທື່ອຄົນໄປທ່ຽວຫວຽດນາມໃນເດືອນມີນາຜ່ານມາ, ເພີ່ມຂຶ້ນຫຼາຍກວ່າໄລຍະດຽວກັນຂອງປີຜ່ານມາ 39,2% ແລະໃນໄຕມາດທຳອິດປີນີ້ກໍມີພົນລະເມືອງຈີນໄປທ່ຽວຫວຽດນາມເກືອບ 9 ແສນ 5 ໝື່ນເທື່ອຄົນ ເພີ່ມຂຶ້ນຫຼາຍກວ່າໄລຍະດຽວກັນຂອງປີຜ່ານມາເຖິງ 63,5%.