ກ່ອນທ່ານສີຈີ້ນຜິງ ປະທານປະເທດຈີນຈະຢ້ຽມຢາມແຟງລັງທາງລັດຖະກິດ, ທ່ານເຊີນລີ້ ເອກອັກຄະລັດຖະທູດຈີນປະຈຳແຟງລັງໃຫ້ສຳພາດຕໍ່ສື່ມວນຊົນວ່າ, ການພົວພັນລະຫວ່າງຈີນກັບແຟງລັງແມ່ນແບບຢ່າງແຫ່ງການຢູ່ຮ່ວມກັນໂດຍສັນຕິແລະຮ່ວມມືຕ່າງຝ່າຍຕ່າງມີຜົນປະໂຫຍດລະຫວ່າງສອງປະເທດທີ່ມີປະຫວັດສາດແລະວັດທະນະທຳຕ່າງກັນ, ລະບອບສັງຄົມແລະໄລຍະພັດທະນາຕ່າງກັນ.
ທ່ານເຊີນລີ້ກ່າວວ່າ, ໂດຍຕອບສະໜອງຕາມຄຳເຊີນຂອງທ່ານຊາວລີ ນີນີສໂຕ ປະນານາທິບໍດີແຟງລັງ, ທ່ານສີຈີ້ນຜິງ ປະທານປະເທດຈີນຈະຢ້ຽມຢາມແຟງລັງທາງລັດຖະກິດແຕ່ວັນທີ 4 ຫາວັນທີ 6 ເມສານີ້. ນີ້ແມ່ນທ່ານປະທານສີຈີ້ນຜິງຢ້ຽມຢາມປະເທດສະຫະພາບເອີລົບເປັນເທື່ອທຳອິດໃນປີນີ້, ກໍ່ແມ່ນປະມຸກລັດຈີນຢ້ຽມຢາມແຟງລັງທາງລັດຖະກິດອີກເທື່ອໜຶ່ງໃນຮອບ 22 ປີມາເຊິ່ງໄດ້ສະແດງໃຫ້ເຫັນຢ່າງເຕັມທີ່ວ່າຈີນເອົາໃຈໃສ່ສູງຕໍ່ສາຍພົວພັນໄມຕີຈິດແລະການຮ່ວມມືອັນເປັນມູນເຊື້ອລະຫວ່າງຈີນກັບແຟງລັງ, ມີຄວາມໝາຍປະຫວັດສາດອັນສຳຄັນ.
ທ່ານເຊີນລີ້ຊີ້ໃຫ້ເຫັນວ່າ, ປັດຈຸບັນ, ການພັວພັນລະຫວ່າງຈີນກັບແຟງລັງຢູ່ໃນລະດັບດີທີ່ສຸດໃນປະຫວັດສາດ, ແລະກຳລັງພັດທະນາຢ່າງວ່ອງໄວ. ສອງປະເທດລ້ວນແຕ່ໃນໄລຍະສຳຄັນໃນການຫັນປ່ຽນຮູບການພັດທະນາເສດຖະກິດ ແລະຍົກລະດັບ, ພວມຕັ້ງໜ້າສຸມໃສ່ເຊື່ອມຕໍ່ແຜນການ 5 ປີຄັ້ງທີ 13 ຂອງຈີນແລະ "ວິໄສທັດການພັດທະນາ 2025 " ຂອງແຟງລັງ, ຂຸດຄົ້ນກຳລັງບົ່ມຊ້ອນໃນການຮ່ວມມື, ເປີດກວ້າງຂົງເຂດຮ່ວມມື, ສ້າງຈຸດເດັ່ນໃໝ່ໃນການຮ່ວມມືຢ່າງບໍ່ຢຸດຢັ້ງ.