ກ່ອນໄປຢ້ຽມຢາມສາທາລະນະລັດແຟງລັງທາງລັດຖະກິດ, ວັນທີ 3 ເມສານີ້, ທ່ານສີຈີ້ນຜີງ ປະທານປະເທດຈີນໄດ້ພິມບົດຄວາມທີ່ພາດຫົວເລື່ອງວ່າ "ມິດຕະພາບທີ່ຜ່ານປະຫວັດສາດ" ລົງ "ໜັງສືພິມແຮນຊີງກີຊາໂນມັດ".
ບົດຄວາມມີບາງຕອນຂຽນວ່າ, ສອງປະເທດຈີນ- ແຟງລັງມີໄມຕີຈິດມິດຕະພາບຕໍ່ກັນ. ແຟງລັງແມ່ນໜຶ່ງໃນປະເທດຕາເວັນຕົກທີ່ສ້າງສາຍສຳພັນທາງການທູດກັບສ.ປ.ຈີນກ່ອນໝູ່, ແມ່ນປະເທດຕາເວັນຕົກປະເທດທຳອິດທີ່ເຊັນສັນຍາການຄ້າລະຫວ່າງລັດຖະບານກັບຈີນ. ຈີນໄດ້ຮັກສາການຮ່ວມມືຢ່າງໃກ້ຊິດ ກັບແຟນລັງໃນວຽກງານສາກົນເປັນເວລາຍາວນານ, ສະໜັບສະໜູນແຟນລັງເສີມຂະຫຍາຍບົດບາດໃຫຍ່ກວ່າເກົ່າໃນວຽກງານສາກົນ ແລະ ປະກອບສ່ວນເຂົ້າໃນສັນຕິພາບ ແລະ ການພັດທະນາຂອງໂລກ. ການພົວພັນຈີນ-ແຟນລັງແມ່ນແບບຢ່າງແຫ່ງານຢູ່ຮ່ວມກັນໂດຍສັນຕິ ແລະ ໄປມາຫາສູ່ກັນດ້ວຍໄມຕິຈິດມິດຕະພາບລະຫວ່າງປະເທດທີ່ເນື່ອທີ່ຕ່າງກັນ, ວັດທະນະທຳຕ່າງກັນ ແລະ ລະດັບການພັດທະນາຕ່າງກັນ. ປັດຈຸບັນ, ຈີນ ກັບ ແຟນລັງກຳລັງຕັ້ງໜ້າສ້າງການພົວພັນຄູ່ຮ່ວມມືແບບໃໝ່ທີ່ມຸ່ງໜ້າໄປສູ່ອະນາຄົດ, ການພົວພັນລະຫວ່າງສອງປະເທດພວມຜະເຊີນໜ້າກັບໂອກາດການພັດທະນາທີ່ດີງາມ. ເສດຖະກິດຈີນ ແລະ ແຟນລັງມີຈຸດພິເສດອັນພົ້ນເດັ່ນຄືຕ່າງຝ່າຍຕ່າງມີທ່າແຮງຂອງຕົນ, ສາມາດຊ່ວຍຊູຍູ້ໜູນກັນ, ຮ່ວມມືກັນ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ. ຈີນເປັນຄູ່ການຄ້າໃຫຍ່ທີ່ສຸດຂອງແຟນລັງຢູ່ອາຊີເປັນເວລາ 14 ປີຢ່າງລຽນຕິດ, ການລົງທຶນສອງຕໍ່ສອງເພິ່ມຂຶ້ນຢ່າງຫຼວງຫຼາຍ. ແຜນການ "5 ປີຄັ້ງທີ13" ຂອງຈີນ ແລະ "ວິໄສທັດການພັດທະນາ 2025" ຂອງແຟນລັງມີຈຸດຄ້າຍຄືກັນໃນຫຼາຍດ້ານ, ການຮ່ວມມືທີ່ຕິດແທດຕົວຈິງໃນຫຼາຍຂົງເຂດລະຫວ່າງສອງປະເທດຈະມີຈຸດເດັ່ນຫຼາຍກວ່າເກົ່າ. ຈີນພວມຕັ້ງໜ້າຊຸກຍູ້ການກໍ່ສ້າງ "ໜຶ່ງແລວທາງໜຶ່ງເສັ້ນທາງ", ຍິນດີຕ້ອນຮັບແຟນລັງເຂົ້າຮ່ວມຢ່າງຕັ້ງໜ້າ.
ບົດຄວາມຂອງທ່ານສີຈີ້ນຜີງຊີ້ອອກວ່າ, ນີ້ແມ່ນທ່ານຢ້ຽມຢາມເຂດເອີລົບເໜືອເປັນເທື່ອທຳອິດນັບແຕ່ຂຶ້ນຮັບຕຳແໜ່ງເປັນປະທານປະເທດຈີນ. ເສດຖະກິດ ເອີລົບເໜືອພັດທະນາຫຼາຍ, ການປະດິດສ້າງມີພະລັງຊີວິດຫຼາຍ, ຈີນ ກັບ ປະເທດເອີລົບເໜືອມີການພົວພັນທີ່ດີງາມ ແລະ ມີຄວາມປາຖະໜ້າຢາກຮ່ວມມືກັນຢ່າງຈິງໃຈ, ການແລກປ່ຽນ ແລະ ການຮ່ວມມືໃນຂົງເຂດຕ່າງໆລະຫວ່າງສອງຝ່າຍໄດ້ຂະຫຍາຍຕົວຢ່າງໝັ້ນທ່ຽງ. ເຊື່ອໝັ້ນວ່າ, ຈີນ ກັບ ເອີລົບເໜືອຕິດຕໍ່ຢ່າງໃກ້ຊິດນັ້ນຈະປະກອບສ່ວນເຂົ້າໃນຄວາມຈະເລີນຂອງເອີລົບ ແລະ ການຂະຫຍາຍການພົວພັນຈີນ-ສະຫະພາບເອີລົບ. ຈີນ ກັບ ສະຫະພາບເອີລົບແມ່ນກຳລັງສຳຄັນສອງແງ່ໃນໂລກ. ປັດຈຸບັນ, ການພົວພັນຄູ່ຮ່ວມຍຸດທະສາດຢ່າງຮອບດ້ານລະຫວ່າງຈີນ ກັບ ສະຫະພາບເອີລົບນັບມື້ນັບຂະຫຍາຍກ້າວສູ່ລວງເລິກ. ຈີນ ແລະ ສະຫະພາບເອີລົບລ້ວນແຕ່ກຳລັງຊຸກຍູ້ການປະຕິຮູບລັກສະນະໂຄງປະກອບ ແລະ ຊຸກຍູ້ເສດຖະກິດສັງຄົມໃຫ້ພັດທະນາ. ການທີ່ສອງຝ່າຍເຊື່ອມຕໍ່ຍຸດທະສາດການພັດທະນາ ແລະ ອອກແຮງໃຫ້ຜົນປະໂຫຍດເຊື່ອມໂຍງເຂົ້າກັນນັ້ນ, ມີຄວາມໝາຍສຳຄັນຕໍ່ການເຕີບໂຕພ້ອມກັນຂອງຈີນ ກັບ ສະຫະພາບເອີລົບ. ຈີນ ກັບ ສະຫະພາບເອີລົບຕ້ອງຍຶດໝັ້ນທັດສະນະຮ່ວມທີ່ເປີດປະຕູສູ່ພາຍນອກ ແລະ ກວມລວມ, ປະກອບສ່ວນໃໝ່ເພື່ອຊຸກຍູ້ສັນຕິພາບ ແລະ ຄວາມຈະເລີນຮຸ່ງເຮືອງຂອງໂລກ.