ຕອນຄ່ຳວັນທີ 1 ເມສານີ້, ສະພາກາແດງໂກລົມບີຢືນຢັນວ່າ, ໄພດິນເຈື່ອນທີ່ເກີດຂຶ້ນຢູ່ໂມໂກອາ ເມືອງເອກແຂວງປູຕູມາໂຢ ພາກຕາເວັນຕົກສຽງໃຕ້ຂອງໂກລົມບີໃນຕອນຮຸ່ງເຊົ້າມື້ດຽວກັນໄດ້ເຮັດໃຫ້ 234 ຄົນເສຍຊີວິດ, 200 ຄົນບາດເຈັບ.
ໃນເວລາລົງກວດການເຂດປະສົບໄພ, ທ່ານຮູອັນ ນູແອນ ຊັງທົສ ກາເດີຣົງ ປະທານາທິບໍດີໂກລົມບີກ່າວວ່າ, ຈະຊ່ວຍເຫືຼອປິ່ນປົວຜູ້ບາເຈັບຢູ່ເຂດປະສົບໄພ ແລະ ຈ່າຍເງິນບຳນານ 6 ພັນ 377 ໂດລາສະຫະລັດໃຫ້ແກ່ຄອບຄົວຂອງຜູ້ເສຍຊີວິດທຸກຄົນ. ກະຊວງສາທາລະນະສຸກໂກລົມບີໄດ້ຂົນສົ່ງວັດສະດຸຕ່າງໆ ເຊັ່ນ, ນ້ຳກິນ 5 ພັນລິດ ແລະ ຄານຫາມເປັນຕົ້ນດ້ວຍທາງອາກາດໄປສູ່ເຂດປະສົບໄພແລ້ວ.
ເມືອງໂມໂກອາມີປະຊາກອນ 4 ໝື່ນ 3 ພັນ 700 ຄົນ. ໄພດິນເຈື່ອນເກີດຂຶ້ນໃນຕອນຮຸ່ງເຊົ້າ 1 ໂມງເຊົ້າ ຕາມເວລາທ້ອງຖິ່ນ, ປະຊາຊົນສ່ວນຫຼາຍກຳລັງນອນຢູ່. ນີ້ແມ່ນໄພທຳມະຊາດທີ່ເຮັດໃຫ້ປະຊາຊົນເສຍຊີວິດ ແລະ ບາດເຈັບຫຼາຍທີ່ສຸດຂອງໂກລົມບີໃນຫຼາຍປີມໍ່ໆມານີ້.