ວັນທີ 3 ເມສານີ້, ກະຊວງປ້ອງກັນປະເທດສ.ເກົາຫຼີປະກາດວ່າ, ປະເທດຕົນ, ອາເມລິກາ ແລະ ຍີ່ປຸ່ນຈະຈັດການຊ້ອມລົບຮ່ວມຕ້ານເຮືອດຳນ້ຳຢູ່ເທິງທະເລເທື່ອທຳອິດພາຍໃນອາທິດນີ້.
ໃນຖະແຫຼງການສະບັບໜຶ່ງ, ກະຊວງປ້ອງກັນປະເທດສ.ເກົາຫຼີກ່າວວ່າ, ການຊ້ອມລົບເທື່ອນີ້ຈະຈັດຂຶ້ນຢູ່ເຂດທະເລລະຫວ່າງປະເທດຕົນ ກັບ ຍີ່ປຸ່ນທີ່ໃກ້ກັບເກາະເຈຈູຂອງປະເທດຕົນ, ຄາດວ່າຈະຈັດຂຶ້ນແຕ່ວັນທີ 3 ຫາວັນທີ 5 ເມສານີ້. ຖະແຫຼງການລະບຸວ່າ, ການຊ້ອມລົບຈະແນໃສ່ "ໄພຂົ່ມຂູ່ຈາກເຮືອດຳນ້ຳ" ຂອງສປປເກົາຫຼີ ເພື່ອຍົກສູງຄວາມສາມາດວັດແທກ, ຈຳແນກ ແລະ ຕິດຕາມເຮືອດຳນ້ຳຂອງ 3 ປະເທດ.
ຖະແຫຼງການຂຽນວ່າ, ສ.ເກົາຫຼີ ອາເມລິກາ ແລະ ຍີ່ປຸ່ນໄດ້ຈັດການເຈລະຈາດ້ານຄວາມໝັ້ນຄົງສາມຝ່າຍໃນເດືອນທັນວາປີກາຍນີ້ເພື່ອຫາລືກ່ຽວກັບການຈັດການຊ້ອມລົບຮ່ວມຕ້ານເຮືອດຳນ້ຳ, ນີ້ແມ່ນການຊ້ອມລົບຮ່ວມປະເພດນີ້ທີ່ຈັດຂຶ້ນເປັນເທື່ອທຳອິດຫຼັງການເຈລະຈາ.
