ວັນທີ 4 ເມສານີ້, ອົງການສະຫະປະຊາຊາດໄດ້ອອກຖະແຫຼງການສະແດງຄວາມເປັນຫ່ວງຕໍ່ເຫດການໂຈມຕີດ້ວຍອາວຸດເຄມີທີ່ເກີດຂຶ້ນຢູ່ແຂວງອິດເລັບ ທາງພາກຕາເວັນຕົກສຽງເໜືອຊີຣີ.
ທ່ານນາງນີກີ ເຮລີ ຜູ້ຕາງໜ້າຖາວອນຂອງອາເມລິກາປະຈຳອົງການສະຫະປະຊາຊາດ, ປະທານໝູນວຽນປະຈຳເດືອນເມສາຂອງສະພາຄວາມໝັ້ນຄົງ ໄດ້ກ່າວໃນໂອກາດເປັນປະທານກອງປະຊຸມສະພາຄວາມໝັ້ນຄົງໃນວັນທີ 4 ເມສານີ້ວ່າ: ສະພາຄວາມໝັ້ນຄົງຈະຮຽກໄຂກອງປະຊຸມດ່ວນໃນຕອນເຊົ້າວັນທີ 5 ເດືອນດຽວກັນ ເພື່ອຫາລືຫຼັງເກີດເຫດການດັ່ງກ່າວ.
ທັງນີ້, ອົງການສັງເກດການດ້ານສິດທິມະນຸດຊີຣີ ທີ່ມີສຳນັກງານໃຫຍ່ຕັ້ງຢູ່ນະຄອນຫຼວງລອນດອນ ປະເທດອັງກິດ ໄດ້ຢືນຢັນໃນວັນທີ 4 ເມສານີ້ວ່າ: ຕອນເຊົ້າມື້ດັ່ງກ່າວ, ຢູ່ເມືອງນ້ອຍແຫ່ງໜຶ່ງ ທາງພາກໃຕ້ແຂວງອິດເລັບ ປະເທດຊີຣີ ໄດ້ຖືກຍົນຮົບໂຈມຕີດ້ວຍອາວຸດທີ່ເປັນອາຍພິດ ສົ່ງຜົນເຮັດໃຫ້ຢ່າງໜ້ອຍເສຍຊີວິດ 58 ຄົນ ທັງມີຜູ້ໄດ້ຮັບບາດເຈັບເປັນຈຳນວນຫຼາຍ.