ວັນທີ 4 ເມສານີ້, ທ່ານ ສີຈິ້ນຜິງ ປະທານປະເທດຈີນໄດ້ສົ່ງໂທລະເລກສະແດງຄວາມເຫັນໃຈຕໍ່ທ່ານ ວລາດີເມຍ ປູຕິນ ປະທານາທິບໍດີຣັດເຊຍ ຫຼັງເກີດເຫດລະເບີດຢູ່ສະຖານີລົດໄຟໃຕ້ດິນຂອງເມືອງຊັງ ປີເຕີສເບີກ.
ທ່ານ ສີຈິ້ນຜິງ ກ່າວວ່າ: ສະຖານີລົດໄຟໃຕ້ດິນຢູ່ເມືອງຊັງ ປີເຕີສເບີກປະເທດຣັດເຊຍໄດ້ເກີດເຫດລະເບີດຢ່າງຫຼວງຫຼາຍ ສົ່ງຜົນເຮັດໃຫ້ມີຜູ້ເສຍຊີວິດແລະບາດເຈັບຢ່າງໜັກໜ່ວງ, ຂ້າພະເຈົ້າຮູ້ສຶກສະເທືອນໃຈຫຼາຍແລະຈີນຂໍກ່າວປະນາມຢ່າງຮຸນແຮງຕໍ່ການກະທຳໂຈມຕີກໍ່ການຮ້າຍດັ່ງກ່າວ. ຂ້າພະເຈົ້າຂໍຕາງໜ້າລັດຖະບານແລະປະຊາຊົນຈີນ ແລະໃນນາມສ່ວນຕົວສະແດງຄວາມໄວ້ອາໄລຢ່າງສຸດຊຶ້ງຕໍ່ຜູ້ເສຍຊີວິດ ແລະສະແດງຄວາມເຫັນໃຈຢ່າງຈິງໃຈຕໍ່ຜູ້ບາດເຈັບແລະຍາດຕິພີ່ນ້ອງຂອງຜູ້ເສຍຊີວິດ. ຂະນະທີ່ປະສົບບັນຫາດັ່ງກ່າວ, ປະຊາຊົນຈີນກໍຢືນຢູ່ຄຽງຂ້າງກັບປະຊາຊົນຣັດເຊຍຢ່າງເດັດດ່ຽວໜຽວແໜ້ນແລະກໍເດັດດ່ຽວຄັດຄ້ານລັດທິກໍ່ການຮ້າຍທຸກຮູບແບບ ທັງຍິນດີຮ່ວມກັບຣັດເຊຍແລະປະຊາຄົມໂລກ ເພີ່ມທະວີການຮ່ວມມືປາບປາມການກໍ່ການຮ້າຍ ເພື່ອປົກປັກຮັກສາສັນຕິພາບແລະຄວາມໝັ້ນຄົງຂອງພາກພື້ນກໍຄືຂອງໂລກ.