ຕາມຂ່າວສານຊິນຮວາ: ສຳນັກງານກິດຈະກຳພະລາຊະວັງໄທຖະແຫຼງໃນວັນທີ 3 ເມສານີ້ວ່າ, ເຈົ້າຊີວິດມະຫາວະຊິຣະລົງກອນຈະລົງນາມໃນຮ່າງລັດຖະທຳມະນູນສະບັບໃໝ່ໃນວັນທີ 6 ເມສານີ້ ແລະຫຼັງລົງນາມຈະເຮັດໃຫ້ຮ່າງລັດຖະທຳມະນູນສະບັບໃໝ່ຈະກາຍເປັນລັດຖະທຳມະນູນສະບັບທີ 20 ຂອງໄທຢ່າງເປັນທາງການ. ຖະແຫຼງການລະບຸວ່າ, ພິທີລົງນາມຈະຈັດຂຶ້ນໃນເວລາ 15 ໂມງຂອງວັນທີ 6 ເມສານີ້ ແລະພາຍຫຼັງລົງນາມແລ້ວຈະມອບໃຫ້ນາຍົກລັດຖະມົນຕີ ແລະສົ່ງຕໍ່ໃຫ້ເຈົ້າໜ້າທີ່ສຳນັກງານເລຂາທິການຄະນະລັດຖະບານໄທປະກາດຈັດຕັ້ງປະຕິບັດລັດຖະທຳມະນູນສະບັບໃໝ່ຢ່າງເປັນທາງການ.
ອີງຕາມທິດທາງການເມືອງຂອງຄະນະລັດຖະບານທ່ານປຣະຍຸດ, ພາຍຫຼັງລັດຖະທຳມະນູນສະບັບໃໝ່ປະກາດໃຊ້ແລ້ວ, ໄທຈະຈັດການເລືອກຕັ້ງທົ່ວໄປຄັ້ງທຳອິດໃນທ້າຍປີ 2017 ຫຼັງການລັດຖະປະຫານເມື່ອປີ 2014. ແນວໃດກໍດີ ກ່ອນໜ້ານີ້, ຄະນະກຳມະການຮ່າງລັດຖະທຳມະນູນໄທຍັງຕ້ອງຮ່າງກົດໝາຍລູກ 4 ສະບັບທີ່ກ່ຽວຂ້ອງກັບການເລືອກຕັ້ງ ໃຫ້ສຳເລັດແລະຜ່ານສະພານິຕິບັນຍັດໄທແລ້ວ, ຈິ່ງຈະສາມາດຈັດການເລືອກຕັ້ງທົ່ວໄປຢ່າງເປັນທາງການ.
 |
