ທ່ານຣຳລີ ດິນ ຜູ້ບັນຊາການຕຳຫຼວດລັດຊາບາປະເທດມາເລເຊຍ ໄດ້ອອກຖະແຫຼງການໃນວັນທີ 4 ເມສານີ້ວ່າ: ເພື່ອປ້ອງກັນກຸ່ມກໍ່ການຮ້າຍອາບູຊາຢາບທີ່ເຄື່ອນໄຫວຢູ່ພາກໃຕ້ຟິລິບປິນ ຈຶ່ງໄດ້ຕົກລົງຂະຫຍາຍເວລາຫ້າມສັນຈອນໃນຍາມກາງຄືນໄປເຖິງວັນທີ 20 ເມສານີ້.
ທ່ານຣຳລີ ດິນ ກ່າວວ່າ: ໃນໄລຍະຫ້າມສັນຈອນໃນຍາມກາງຄືນ, ແຕ່ລະມື້ ປະຊາຊົນຈະຕ້ອງຢູ່ໃນເຮືອນຕົນນັບແຕ່ເວລາ 18:00 ໂມງຫາ 6:00 ໂມງເຊົ້າ, ທັງຫ້າມບໍ່ໃຫ້ປະຊາຊົນຈາກບ່ອນອື່ນເຂົ້າລັດຊາບາໃນໄລຍະເວລາດັ່ງກ່າວ. ຂະນະທີ່ເຈົ້າໜ້າທີ່ຂະຫຍາຍເວລາຫ້າມສັນຈອນໃນຍາມກາງຄືນກໍເພື່ອປ້ອງກັນບໍ່ໃຫ້ກຸ່ມປະກອບອາວຸດເຂົ້າລ່ວງລ້ຳເຂດທະເລທີ່ຫ້າມສັນຈອນໃນຍາມກາງຄືນ ແລະຫຼີກເວັ້ນການຂົ່ມຂູ່ຄວາມປອດໄພຂອງປະຊາຊົນທ້ອງຖິ່ນແລະນັກທ່ອງທ່ຽວ.
ນອກນີ້, ທ່ານຣຳລີ ດິນ ຍັງຊີ້ໃຫ້ເຫັນອີກວ່າ: ເຈົ້າໜ້າທີ່ຕຳຫຼວດໄດ້ຮັບຂ່າວລັບວ່າ, ກຸ່ມປະກອບອາວຸດອາບູຊາຢາບ ຍັງມີເຈຕະນາລ່ວງລ້ຳເຂົ້າເຂດຄວບຄຸມຄວາມປອດໄພທາງພາກຕາເວັນອອກຊາບາ ແລະ ການປະຕິບັດການຫ້າມສັນຈອນໃນຍາມກາງຄືນ ນອກຈາກເພື່ອປ້ອງກັນຄວາມປອດໄພຂອງປະຊາຊົນແລະເຂດທະເລພາກຕາເວັນອອກຊາບາແລ້ວ, ຍັງສ້າງຄວາມສະດວກໃຫ້ແກ່ກອງກຳລັງປ້ອງກັນຄວາມປອດໄພຕິດຕາມແລະປະຕິບັດກົດໝາຍ ທັງສ້າງຄວາມຄວາມປອດໄພໃຫ້ແກ່ຜູ້ປະກອບການລີສອດ ແລະ ຊາວປະມົງອີກດ້ວຍ.