ສື່ມວນຊົນຝຣັ່ງລາຍງານໃນວັນທີ 5 ເມສານີ້ວ່າ, ໄອຍະການປາຣີ ປະເທດຝຣັ່ງ ເລີ່ມສືບສວນ-ສອບສວນເຈົ້າໜ້າທີ່ຕຳຫຼວດທີ່ຍິງສັງຫານທ່ານຫຼິວຊ້າວຢາວ ຊາວຈີນທີ່ອາໄສຢູ່ປະເທດຕົນ ເພື່ອດຳເນີນຄະດີຕາມກົດໝາຍ.
ຂ່າວລາຍງານວ່າ: ໃນວັນດັ່ງກ່າວ, ໄອຍະການປາຣີເລີ່ມດຳເນີນຄະດີ "ເຈົ້າໜ້າທີ່ອົງການອຳນາດສາທາລະນະຖືກສົງໄສຈົງໃຈໃຊ້ຄວາມຮຸນແຮງແລະເຮັດໃຫ້ຄົນເສຍຊີວິດໂດຍບໍ່ເຈຕະນາ" ທັງແຕ່ງຕັ້ງຜູ້ພິພາກສາກ່ອນການພິຈາລະນາຄະດີໜຶ່ງຄົນເພື່ອຮັບຜິດຊອບການສືບສວນ-ສອບສວນ.
ຂ່າວແຈ້ງອີກວ່າ: ບົດລາຍງານການສັນນະສູດຂອງເຈົ້າໜ້າທີ່ຕຳຫຼວດເມື່ອບໍ່ດົນມານີ້ໄດ້ລະບຸວ່າ ທ່ານຫຼິວຊ້າວຢາວບໍ່ໄດ້ເສບຢາເສບຕິດ ຫຼື ກິນຢາໃດໆ ກ່ອນຈະຖືກຕຳຫຼວດຍິງສັງຫານໃນຕອນຄ່ຳວັນທີ 26 ມີນາຜ່ານມາ.
ທັງນີ້ ຕອນຄ່ຳວັນທີ 26 ມີນາຜ່ານມາຕາມເວລາທ້ອງຖິ່ນ, ທ່ານຫຼິວຊ້າວຢາວ ພົນລະເມືອງຈີນທີ່ອາໄສຢູ່ຝຣັ່ງ ໄດ້ຖືກຕຳຫຼວດຍິງສັງຫານຢູ່ເຮືອນຕົນເຂດທີ 19 ນະຄອນຫຼວງປາຣີ ແລະຫຼັງສັງຫານ, ຊາວຝຣັ່ງເຊື້ອສາຍຈີນແລະຊາວຈີນຕ່າງດ້າວຕ່າງກໍສະແດງຄວາມບໍ່ພໍໃຈຢ່າງຮຸນແຮງ.